ସାମାନ୍ୟ କଥାରୁ କୁରାଢ଼ି ଚୋଟ: ଗୁରୁତର ବୃଦ୍ଧଙ୍କୁ ଚିକିତ୍ସା କରିବା ସମୟରେ ଛୁଞ୍ଚି-ସୂତା ଅଭାବ, ବାହାରୁ କିଣି ଚିକିତ୍ସା କଲେ ଡାକ୍ତର |

କେନ୍ଦୁଝର ଜିଲା ପାଟଣା ବ୍ଲକ ଡୁମୁରିଆ ପଞ୍ଚାୟତ ତୋଣ୍ଡ ଗ୍ରାମର ଜାମୁନାଳିଆ ସାହିରେ ସାମାନ୍ୟ ବଚସାକୁ କେନ୍ଦ୍ର କରି ଜଣେ ମଦ୍ୟପଙ୍କ କୁରାଢ଼ି ଆକ୍ରମଣରେ ଜଣେ ବୃଦ୍ଧ ଗୁରୁତର ହୋଇଛନ୍ତି। ଗୁରୁତର ବ୍ୟକ୍ତି ଜଣକ ହେଉଛନ୍ତି ତୋଣ୍ଡ ଗ୍ରାମର ଅଯୋଧ୍ୟା ନାୟକ। ତାଙ୍କୁ ପ୍ରଥମେ ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ପରେ କେନ୍ଦୁଝର ସ୍ଥିତ ଧରଣୀଧର ମେଡ଼ିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତର କରାଯାଇଛି।

ସୂଚନା ଅନୁଯାୟୀ, ବୁଧବାର ରାତିରେ ଅଯୋଧ୍ୟା ଗାଁର ପୁତୁଲୁ ମୁଣ୍ଡାଙ୍କ ଘରେ ବସିଥିବା ସମୟରେ, ସେହି ଗ୍ରାମର ବାଲ୍ମୀକି ନାଏକ ଜାମୁଳେଇବେଡ଼ା ସାପ୍ତାହିକ ହାଟରୁ ମଦ ପିଇ ଆସି ତାଙ୍କ ସହ ଯୁକ୍ତିତର୍କ କରିଥିଲେ। ବଚସା ଉଗ୍ରରୂପ ନେବାରୁ ବାଲ୍ମୀକି ଏକ କୁରାଢ଼ିରେ ଅଯୋଧ୍ୟାଙ୍କ ମୁଣ୍ଡକୁ ଅତର୍କିତ ଆକ୍ରମଣ କରିଥିଲେ। ଆକ୍ରମଣରେ ଅଯୋଧ୍ୟା ରକ୍ତଜୁଡ଼ୁବୁଡ଼ୁ ହୋଇ ଗୁରୁତର ହୋଇପଡ଼ିଥିଲେ। ପରିବାର ଲୋକେ ତାଙ୍କୁ ୧୦୮ ଆମ୍ବୁଲାନ୍ସ ସହାୟତାରେ ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ।

ଅନ୍ୟପଟେ ଡାକ୍ତରଖାନାର ବିପର୍ଯ୍ୟସ୍ତ ସ୍ୱାସ୍ଥ୍ୟସେବାର ଚିତ୍ର ପଏଲା ପଡ଼ିଛି। ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଗୁରୁତର ରୋଗୀଙ୍କ ସିଲାଇ (ସିଲାଇ କାମ) ପାଇଁ ପ୍ରାଥମିକ ସାମଗ୍ରୀ ଛୁଞ୍ଚି ଓ ସୂତା ଉପଲବ୍ଧ ନ ଥିଲା। ଚିକିତ୍ସା କରୁଥିବା ଡାକ୍ତର ଅଭିଷେକ ସାହୁ ମାନବିକତା ଦେଖାଇ ନିଜେ ବାହାର ମେଡିସିନ୍ ଦୋକାନରୁ ଛୁଞ୍ଚି-ସୂତା କିଣି ଆଣି ଗୁରୁତର ବୃଦ୍ଧଙ୍କ ପ୍ରାଥମିକ ଚିକିତ୍ସା କରିଥିଲେ। ପରେ ତାଙ୍କ ସ୍ୱାସ୍ଥ୍ୟବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।