ନିଜ ଝିଅକୁ ନିଆଁ ମୁହଁକୁ ଠେଲି ଦେଲା ମା’

ନିଜ ଝିଅକୁ ନିଆଁ ମୁହଁକୁ ଠେଲି ଦେଲା ମା’ । ଭାଇ ବି ଏହି ଜଘନ୍ୟ କାଣ୍ଡରେ ମା’କୁ ସହଯୋଗ କଲା। ଭୁଲ୍‌ ଏତିକି ଥିଲା ଝିଅଟି ବିବାହ ପୂର୍ବରୁ ମା’ ହେବାକୁ ଯାଉଥିଲା। ଯୁବତୀଜଣକ ୭ ମାସର ଗର୍ଭବତୀ ଥିବା ବେଳେ ନିଜ ଜନ୍ମ କଲା ମା’ ହିଁ ତାକୁ ମରଣ ମୁହଁକୁ ଠେଲିଦେଲା। ଫଳରେ ଏବେ ମୁମୂର୍ଷ ଅବସ୍ଥାରେ ସେ ହସ୍ପିଟାଲ ବେଡରେ ପଡ଼ି ଛଟପଟ ହେଉଛି। ଏପରି ଏକ ଭୟାନକ ଘଟଣା ଉତ୍ତରପ୍ରଦେଶର ହାପୁର ଜିଲ୍ଲାରେ ଘଟିଛି।ଉତ୍ତରପ୍ରଦେଶର ନାୱଡା ଖୁର୍ଦ ଗାଁର ଜଣେ ଯୁବତୀଙ୍କର ଉକ୍ତ ଗାଁର ଜଣେ ଯୁବକଙ୍କ ସହ ପ୍ରେମ ସମ୍ପର୍କ ସୃଷ୍ଟି ହୋଇଥିଲା। ଇତି ମଧ୍ୟରେ ଉଭୟଙ୍କ ମଧ୍ୟରେ ଶାରୀରିକ ସମ୍ପର୍କ ସ୍ଥାପନ ହୋଇଥିଲା। ଫଳରେ ଯୁବତୀଜଣକ ଗର୍ଭବତୀ ହୋଇଥିଲେ।ପ୍ରଥମେ ଯୁବତୀଙ୍କ ପରିବାର ଲୋକେ ଏହା ଜାଣି ପାରି ନ ଥିବା ବେଳେ ଦିନ ଗଡ଼ିବାରୁ ଏହି କଥା ଉପରକୁ ପରଦା ହଟିଥିଲା। ଏହାକୁ ନେଇ ଯୁବତୀଙ୍କ ସମେତ ତାଙ୍କ ପରିବାର ଲୋକଙ୍କୁ ଗାଁ ଲୋକେ ଟାହିଟାପରା କରିଥିଲେ।ଏହା ମଧ୍ୟରେ ଯୁବତୀଜଣକ ୭ ମାସର ଗର୍ଭବତୀ ହୋଇ ସାରିଥିଲେ। ଝିଅର ଏପରି କାମ ଯୋଗୁ ମୁଣ୍ଡ ନଇଁ ଯାଇଥିବାରୁ ତାକୁ ରାସ୍ତାରୁ ହଟାଇବାକୁ ମା’, ଭାଇ ଷଡଯନ୍ତ୍ର କଲେ। ଏହାପରେ ସେମାନେ ସୁଚିନ୍ତିତ ଯୋଜନା ମୁତାବକ, ଯୁବତୀଙ୍କୁ ଡାକି ନେଇ ନିକଟସ୍ଥ ଜଙ୍ଗଲକୁ ଯାଇଥିଲେ। ସେଠାରେ ସେମାନେ ତାଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ।ଯୁବତୀଜଣକ ଚିତ୍କାର କରିବାରୁ ତାଙ୍କ ମା’, ଭାଇ ଘଟଣାସ୍ଥଳରୁ ଫେରାର ହୋଇ ଯାଇଥିଲେ। ଏହାପରେ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରିଥିଲେ। ଯୁବତୀଙ୍କ ଶରୀରର ୭୦% ଜଳି ଯାଇଥିବା ବେଳେ ଅବସ୍ଥା ସଙ୍କଟାପନ୍ନ ରହିଛି। ତେଣୁ ତାଙ୍କୁ ଉନ୍ନତ ଚିକିତ୍ସା ପାଇଁ ଅନ୍ୟତ୍ର ପଠାଯାଇଛି।ପୁଲିସ୍‌ ଏହି ଘଟଣାର ତଦନ୍ତ ଆରମ୍ଭ କରି ପୀଡ଼ିତାଙ୍କ ମା’, ଭାଇଙ୍କୁ ନିଜ ହେପାଜତକୁ ନେଇ ପଚରାଉଚରା କରୁଛି।