ଧ୍ୱଂସ ପାଇଯିବ ଆମେରିକା! ଟ୍ରମ୍ପ ଏବେ କରିବେ କ’ଣ?

ଓ୍ବାଶିଂଟନ,୩୦।୮: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିଶ୍ୱର ଅନେକ ଦେଶ ଉପରେ ଟାରିଫ୍‌ ଲାଗୁ କରିଛନ୍ତି। ସମ୍ପ୍ରତି ଭାରତ ଉପରେ ମଧ୍ୟ ୫୦ ପ୍ରତିଶତ ଟାରିଫ୍‌ ଲାଗୁ କରାଯାଇଛି। ଏବେ ଏହି ଟାରିଫ୍‌ ବିବାଦ ଆମେରିକାର କୋର୍ଟରେ ପହଞ୍ଚିଛି। କୋର୍ଟ ଏହାକୁ ଅବୈଧ ବୋଲି କହିଛନ୍ତି। କୋର୍ଟ ସ୍ପଷ୍ଟ ଭାବରେ କହିଛନ୍ତି, ଟ୍ରମ୍ପ ଟାରିଫ୍‌ ଲାଗୁ କରିବା ପାଇଁ ଯେଉଁ କ୍ଷମତା ବ୍ୟବହାର କରିଥିଲେ ତାହା ଆଇନଗତ ନୁହେଁ। ଟ୍ରମ୍ପ ଏହି ନିଷ୍ପତ୍ତିକୁ କଡ଼ା ସମାଲୋଚନା କରିଛନ୍ତି ଏବଂ କହିଛନ୍ତି ଯେ, ଯଦି ଏହି ଟାରିଫ୍‌ ହଟାଇ ଦିଆଯାଏ, ତେବେ ଆମେରିକା ଧ୍ୱଂସ ହୋଇଯିବ।
ଆମେରିକାର କୋର୍ଟ କହିଛନ୍ତି, ଟ୍ରମ୍ପଙ୍କ ପାଖରେ ପ୍ରତ୍ୟେକ ଆମଦାନୀ ଉପରେ ଟାରିଫ୍‌ ଲାଗୁ କରିବାର କ୍ଷମତା ନାହିଁ। ତଥାପି, କୋର୍ଟ ଏହି ନିଷ୍ପତ୍ତିକୁ ଅକ୍ଟୋବର ପର୍ଯ୍ୟନ୍ତ କାର୍ଯ୍ୟକାରୀ କରିବାରୁ ନିବୃତ୍ତ କରିଛନ୍ତି, ତେଣୁ ଟ୍ରମ୍ପ ଏହି ମାମଲାରେ ସୁପ୍ରିମକୋର୍ଟରେ ମଧ୍ୟ ଆବେଦନ କରିପାରିବେ। ଟାରିଫ୍‌ ସମ୍ପର୍କରେ ଟ୍ରମ୍ପ କହିଛନ୍ତି, ଏହା ଭବିଷ୍ୟତରେ ମଧ୍ୟ ଜାରି ରହିବ।
ଆମେରିକା କୋର୍ଟଙ୍କ ନିଷ୍ପତ୍ତିର କିଛି ମିନିଟ ପରେ, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ନିଷ୍ପତ୍ତିକୁ ତୀବ୍ର ସମାଲୋଚନା କରିଥିଲେ ଏବଂ କହିଥିଲେ ଯେ, ଯଦି ଏହା କାର୍ଯ୍ୟକାରୀ ହୁଏ ତେବେ ଏହା ଦେଶ ପାଇଁ ସମ୍ପୂର୍ଣ୍ଣ ବିପର୍ଯ୍ୟସ୍ତ ହେବ। ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ ସୋସିଆଲରେ ଏକ ପୋଷ୍ଟରେ, ସେ କୋର୍ଟକୁ “ଅତ୍ୟନ୍ତ ପକ୍ଷପାତୀ” ବୋଲି ଅଭିଯୋଗ କରିଥିଲେ ଏବଂ ଦାବି କରିଥିଲେ, ସୁପ୍ରିମକୋର୍ଟ ତାଙ୍କ ସପକ୍ଷରେ ରାୟ ଦେବେ। ଯଦି ଏହି ଟାରିଫ୍‌ ହଟିଯାଏ, ତେବେ ଏହା ଆମେରିକା ପାଇଁ ସମ୍ପୂର୍ଣ୍ଣ ବିନାଶକାରୀ ହେବ। ଯଦି ଏହାକୁ ବଳବତ୍ତର ରଖାଯାଏ, ତେବେ ଏହି ନିଷ୍ପତ୍ତି ପ୍ରକୃତରେ ଆମେରିକାକୁ ଧ୍ୱଂସ କରିଦେବ,ଟ୍ରମ୍ପ ତାଙ୍କ ପୋଷ୍ଟରେ ଲେଖିଛନ୍ତି।
ହ୍ବାଇଟ ହାଉସ ମୁଖପାତ୍ର କୁଶ ଦେଶାଇ ଏକ ପୃଥକ ବିବୃତ୍ତିରେ କହିଛନ୍ତି, ୍‌ରାଷ୍ଟ୍ରପତିଙ୍କ ଟାରିଫ୍‌ ଏବେ ବି ବଳବତ୍ତର ଅଛି ଏବଂ ଏହି ମାମଲାରେ ଚୂଡ଼ାନ୍ତ ନିଷ୍ପତ୍ତିରେ ଆମର ବିଜୟ ଆମେ ଆଶା କରୁଛୁ।
ଟ୍ରମ୍ପ ଟାରିଫ୍‌କୁ ତାଙ୍କର ଅସ୍ତ୍ର କରିଥିଲେ। ଡୋନାଲ୍ଡ ଟ୍ରମ୍ପ ତାଙ୍କ ଦ୍ୱିତୀୟ କାର୍ଯ୍ୟକାଳରେ ଟାରିଫ୍‌ ଉପରେ ବହୁତ ନିର୍ଭର କରିଛନ୍ତି। ସେ ଏହାକୁ ଏକ ଅସ୍ତ୍ର ଭାବରେ ମଧ୍ୟ ବ୍ୟବହାର କରିଛନ୍ତି। ଟ୍ରମ୍ପ ଅନ୍ୟ ଦେଶ ଉପରେ ଚାପ ପକାଇବା ପାଇଁ ଧମକ ଦେଇ ଟାରିଫ୍‌ ଲାଗୁ କରିଥିଲେ। ଯଦିଓ ଏହି ନିଷ୍ପତ୍ତି ସାରା ବିଶ୍ୱର ଲୋକଙ୍କୁ ଅସୁବିଧାରେ ପକାଇଛି, ବଜାରର ଅବସ୍ଥା ମଧ୍ୟ ଖରାପ ହୋଇଛି।
ଟ୍ରମ୍ପଙ୍କ ଟାରିଫ୍‌ ପଦକ୍ଷେପ ବିରୋଧରେ ଅତି କମରେ ୮ଟି ମାମଲା ଦାୟର କରାଯାଇଛି, ଏଥିରେ କାଲିଫର୍ନିଆ ରାଜ୍ୟ ଦ୍ୱାରା ଦାୟର କରାଯାଇଥିବା ମାମଲା ମଧ୍ୟ ସାମିଲ ଅଛି।