କାହିଁକି ଆମିଷ ତରକାରୀ କରିନୁ…ଠେଙ୍ଗାରେ ସ୍ତ୍ରୀଙ୍କୁ ମରଣାନ୍ତକ ଆକ୍ରମଣ, ୨ବର୍ଷ ପରେ ଜେଲ୍ ଗଲେ ସ୍ବାମୀ

ଆମିଷ ତରକାରୀକୁ ନେଇ ସ୍ତ୍ରୀକୁ ହତ୍ୟା ଉଦ୍ୟମ କରିଥିଲେ ସ୍ବାମୀ । ଏହି ଘଟଣାରେ ଦୁଇବର୍ଷ ପରେ ସ୍ବାମୀଙ୍କୁ ଗିରଫ କରାଯାଇଛି । ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ମୌଳାଭଞ୍ଜା ଗ୍ରାମର ଜୁରିଆ ସେଠୀ(୩୬) ଗତ ୨୦୨୪ ମେ ୨୦ ତାରିଖ ମଧ୍ୟାହ୍ନ ପ୍ରାୟ ୧୨ ଟାରେ ଖାଇ ବସିଥିବା ବେଳେ ଆଜି କାହିଁକି ଆମିଷ ତରକାରୀ କରିନୁ ବୋଲି ସ୍ତ୍ରୀ ଚଞ୍ଚଳା ସେଠୀଙ୍କୁ ପଚାରିଥିଲେ। ସୋମବାର କାରଣରୁ ଆମିଷ ତରକାରୀ କରାଯାଇନଥିବା ଚଞ୍ଚଳା ସ୍ବାମୀଙ୍କୁ କହିଥିଲେ । ଏଥିରେ ଉତ୍ତେଜିତ ହୋଇ ଜୁରିଆ ତାଙ୍କୁ ଆପତ୍ତିଜନକ ଭାଷାରେ ଗାଳି କରି ଏକ ଠେଙ୍ଗାରେ ଚଞ୍ଚଳାଙ୍କୁ ନିସ୍ତୁକ ଭାବେ ମାଡ଼ ମାରିଥିଲେ।

ଚଞ୍ଚଳାଙ୍କ ମୁଣ୍ଡ ଓ ଡାହାଣ ଆଖି ପତାରେ ଗଭୀର ଆଘାତ ହୋଇଥିଲା। ତାଙ୍କ ୨ ପୁଅ ଓ ସାହି ପଡୋଶୀ ଲୋକେ ତାଙ୍କୁ ରକ୍ତାକ୍ତ  ଅବସ୍ଥାରେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ଘଟଣାର ପରଦିନ ଚଞ୍ଚଳା  ଦିଗପହଣ୍ଡି ଥାନାରେ ଏତଲା ଦେବାପରେ ମାମଲା ନଂ.୨୨୩/୨୪ ଆଇପିସି ର ଦଫା – ୩୨୩/୫୦୬/୩୦୭ ଅନୁଯାୟୀ ପୋଲିସ ଅଭିଯୁକ୍ତଙ୍କ ବିରୋଧରେ ମକଦ୍ଦମା ରୁଜୁ କରିଥିଲେ। ଗିରଫ ଭୟରେ ଅଭିଯୁକ୍ତ ଘଟଣା ପରଠାରୁ ଫେରାର ଥିଲେ ।

ଅଭିଯୁକ୍ତ ଜୁରିଆ ବୁଧବାର ଗାଁରେ ଥିବା ଖବର ପାଇ ତଦନ୍ତକାରୀ ଅଧିକାରୀ ଏସ.ଆଇ ସୋଫିଆ ମିଶ୍ର ସଦଳବଳେ ତାଙ୍କ ଘରେ ଚଢ଼ାଉ କରି ଅପରାହ୍ନ ପ୍ରାୟ ୧ ଟାରେ ଗିରଫ କରି ସନ୍ଧ୍ୟାରେ କୋର୍ଟ ଚାଲାଣ କରିଥିଲେ। ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି ।