Now Odisha

ବିବାହର ମିଛ ପ୍ରତିଶ୍ରୁତି ଦେଇ ପ୍ରେମିକାଙ୍କ ସହ ବାରମ୍ବାର ଶାରୀରିକ ସମ୍ପର୍କ ସ୍ଥାପନ କରିବା ଏବଂ ପରବର୍ତ୍ତୀ ସମୟରେ ପ୍ରତାରଣା କରିବା ଅଭିଯୋଗରେ ଜଣେ ଯୁବକଙ୍କୁ ଗିରଫ କରିଛି ଦେବଗଡ଼ ଥାନା ପୋଲିସ। ପୀଡ଼ିତା ଯୁବତୀ ଜଣକ ବର୍ତ୍ତମାନ ୩ ମାସର ଗର୍ଭବତୀ ଥିବା ବେଳେ ତାଙ୍କ ଲିଖିତ ଅଭିଯୋଗ ଆଧାରରେ ପୋଲିସ ମଙ୍ଗଳବାର ଅଭିଯୁକ୍ତ ପ୍ରେମିକଙ୍କୁ କୋର୍ଟଚାଲାଣ କରିଛି। ଜାମିନ୍ ଆବେଦନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି। ଗିରଫ ଯୁବକ ଜଣକ ଦେବଗଡ଼ ଥାନା ଅନ୍ତର୍ଗତ କଣ୍ଢଳ ଗ୍ରାମର ରାକେଶ ବେହେରା (୨୩) ବୋଲି ଜଣାପଡ଼ିଛି।

ଅଭିଯୋଗ ଅନୁଯାୟୀ, ଗତ ୩ ବର୍ଷ ହେବ ରାକେଶ ଏବଂ ଉକ୍ତ ଯୁବତୀଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ଏହା ପରେ ବିବାହର ପ୍ରତିଶ୍ରୁତି ଦେଇ ୨୦୨୩ ମସିହାରୁ ରାକେଶ ଯୁବତୀଙ୍କ ସହ ବିଭିନ୍ନ ସମୟରେ ଶାରୀରିକ ସମ୍ପର୍କ ସ୍ଥାପନ କରିଆସୁଥିଲା। କିଛି ଦିନ ତଳେ ଯୁବତୀଙ୍କ ବିବାହ ଅନ୍ୟତ୍ର ଠିକ୍ ହେବାରୁ, “ମୋତେ ବିବାହ ନକଲେ ଆତ୍ମହତ୍ୟା କରିବି” ବୋଲି ରାକେଶ ଧମକ ଦେଇଥିଲା। ଫଳରେ ରାକେଶଙ୍କ କଥାରେ ଆସି ଯୁବତୀ ଜଣକ ନିଜ ଘରେ କିଛି ନଜଣାଇ ତାଙ୍କ ସହ ପୁରୀ ପଳାଇଥିଲେ।

ପୁରୀରେ କିଛି ଦିନ ରହିବା ପରେ, ରାକେଶ ସୋନପୁରରେ କାମ କରୁଥିବାରୁ ଦୁହେଁ ସେଠାରେ ଘର ଭଡ଼ା ନେଇ ରହୁଥିଲେ। କିଛି ମାସ ଏକାଠି ରହିବା ପରେ, ଗତ କିଛି ଦିନ ତଳେ ଯୁବତୀଙ୍କୁ କିଛି ନକହି ରାକେଶ ହଠାତ୍ ନିଜ ଗାଁକୁ ପଳାଇ ଆସିଥିଲା। ୨ ଦିନ ପର୍ଯ୍ୟନ୍ତ ସୋନପୁର ନଫେରିବାରୁ ସନ୍ଦେହ ହେବାରୁ ଯୁବତୀ ଜଣକ ରାକେଶଙ୍କ ଗାଁକୁ ଆସି ପରିବାର ଲୋକଙ୍କୁ ସବୁ କଥା ଜଣାଇଥିଲେ।

ତେବେ ରାକେଶଙ୍କ ପରିବାର ଲୋକେ ପୀଡ଼ିତାଙ୍କ କଥା ଶୁଣିବା ବଦଳରେ ତାଙ୍କୁ ଅସଭ୍ୟ ଭାଷାରେ ଗାଳିଗୁଳଜ କରି ଘରୁ ବାହାର କରି ଦେଇଥିଲେ। କୌଣସି ଉପାୟ ନପାଇ ପୀଡ଼ିତା ଯୁବତୀ ଜଣକ ଦେବଗଡ଼ ଥାନାରେ ସବିଶେଷ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହ ଅଭିଯୁକ୍ତ ରାକେଶକୁ ଗିରଫ କରି କୋର୍ଟଚାଲାଣ କରିଛି।