ସେକ୍ସପିଅର ତାଙ୍କ ନାଟକ ହାମଲେଟ୍‌ରେ ଲେଖିଥିବା ଧାଡ଼ିଟିଏ

ସେକ୍ସପିଅର ତାଙ୍କ ନାଟକ ହାମଲେଟ୍‌ରେ ଲେଖିଥିବା ଧାଡ଼ିଟିଏ- ଡେନ୍‌ମାର୍କ ରାଜ୍ୟରେ କିଛି ପଚି ଯାଇଛି! ଏହା ସେହିପରି ସଂକେତ ଦିଏ। ଚୀନ ରାଜନୀତିରେ କିଛି ପଚି ଯାଇଛି କି? ଏଭଳି ପ୍ରଶ୍ନ ଓ ସନ୍ଦେହ ପ୍ରକଟ କରିଛନ୍ତି ଜାପାନରେ ଅବସ୍ଥିତି ମାର୍କିନ ରାଷ୍ଟ୍ରଦୂତ ରାହ୍‌ମ ଇମାନୁଏଲ।ଚୀନର ଆଭ୍ୟନ୍ତରୀଣ ରାଜନୀତି ଓ ସରକାରରେ ସୃଷ୍ଟି ହୋଇଥିବା ଏକ ସଂକଟ ସଂପର୍କରେ ଇମାନୁଏଲ ପୂର୍ବରୁ ଟୁଇଟର ନାମରେ ଖ୍ୟାତ ଏବେକାର ଏକ୍ସରେ କ୍ରମାଗତ ଭାବେ ଦୁଇ ଥର ଚୀନ ସରକାରରେ ଘଟିଥିବା ଦୁଇଟି ରହସ୍ୟଜନକ ଘଟଣା ସଂପର୍କରେ ଉପସ୍ଥାପନ କରିଛନ୍ତି।କିଛି ମାସ ତଳେ ପ୍ରଥମେ ଚୀନର ବୈଦେଶିକ କିନ୍‌ ଗାଙ୍ଗ ନିଖୋଜ ହୋଇଗଲେ। ଚୀନ ସରକାରଙ୍କ ତରଫରୁ ଏନେଇ କିଛି କୁହାଯାଗଲା ନାହିଁ। ଶୁଣାକଥାକୁ ନେଇ ଖବର ଆସିଲା ଯେ ସେ ପ୍ରେମରେ ପଡ଼ିଯାଇଛନ୍ତି। ସେଥିପାଇଁ କାର୍ଯ୍ୟରେ ଯୋଗଦେଉ ନାହାନ୍ତି। ମାତ୍ର, ପରେ ଜଣାପଡ଼ିଲା ଯେ ତାଙ୍କର ଦୀର୍ଘ ଅନୁପସ୍ଥିତି ପରେ ଚୀନ ରାଷ୍ଟ୍ରପତି ଜି ଜିନ୍‌ପିଙ୍ଗ ତାଙ୍କ ସ୍ଥାନରେ ଆଉ ଜଣେ ନୂଆ ବୈଦେଶିକ ମନ୍ତ୍ରୀ ନିଯୁକ୍ତ କରିଛନ୍ତି।ଏବେ ପୁଣି ଖବର ମିଳୁଛି ଯେ ଚୀନର ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁ ତିନି ସପ୍ତାହ ଧରି ନିଖୋଜ। ଇମାନୁଏଲ ତାଙ୍କ ଏକ୍ସ ପୋଷ୍ଟରେ ଲେଖିଛନ୍ତି, ଯେମିତି ସେକ୍ସପିଅରଙ୍କ ନାଟକ ହାମଲେଟ୍‌ରେ ଲେଖାଅଛି, ଡେନ୍‌ମାର୍କରେ କିଛି ଗୋଟେ ପଚି ଯାଇଛି! ପ୍ରଥମେ ନି ସପ୍ତାହ ଧରି ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁଙ୍କଠାରୁ କିଛି ଶୁଣିବାକୁ ମିଳିନାହିଁ କିମ୍ବା ସାଧାରଣରେ ସେ ଦେଖାଯାଇ ନାହାନ୍ତି। ଦ୍ୱିତୀୟରେ ସେ ତାଙ୍କର ଭିଏତନାମ ଗସ୍ତରେ ମଧ୍ୟ ଦେଖାଗଲେ ନାହିଁ। ଏବଂ ଏବେ ସେ ସିଙ୍ଗାପୁର ନୌସେନା ମୁଖ୍ୟଙ୍କ ସହ ତାଙ୍କର ଧାର୍ଯ୍ୟ ବୈଠକରେ ମଧ୍ୟ ଅନୁପସ୍ଥିତ ରହିଲେ। କାରଣ କ’ଣ ସେ ଏବେ ଗୃହବନ୍ଦୀ?ସେପ୍ଟେମ୍ବର ୮ ତାରିଖରେ ମଧ୍ୟ ରାଷ୍ଟ୍ରଦୂତ ଇମାନୁଏଲ ଏକ୍ସରେ ଅନ୍ୟ ଏକ ପୋଷ୍ଟ କରିଥିଲେ। ସେଥିରେ ସେ ଆଗାଥା କ୍ରିଷ୍ଟିଙ୍କ ଉପନ୍ୟାସ ‘ଆଣ୍ଡ ଦେନ୍‌ ଦେୟାର ୱେଆର୍‌ ନନ୍‌ (ଏବଂ ସେବେ ଆଉ କେହି ନଥିଲେ!) ସହ ଚୀନର ଅବସ୍ଥାକୁ ତୁଳନା କରିଥିଲେ। ସେ ଲେଖିଥିଲେ, ରାଷ୍ଟ୍ରପତି ଜି’ଙ୍କ କ୍ୟାବିନେଟ୍ ଆଗାଥା କ୍ରିଷ୍ଟିଙ୍କ ଉପନ୍ୟାସ ଆଣ୍ଡ ଦେୟାର୍‌ ୱେଆର୍‌ ନନ୍‌ ସହ ସାମଞ୍ଜସ୍ୟ ରଖୁଛି। ପ୍ରଥମେ ବୈଦେଶିକ ମନ୍ତ୍ରୀ କିନ୍‌ ଗାଙ୍ଗ ନିଖୋଜ ହୋଇଗଲେ। ତା’ପରେ ରକେଟ୍‌ ବାହିନୀର ଦୁଇ ଜଣ କମାଣ୍ଡରଙ୍କ ପତ୍ତା ମିଳିଲା ନାହିଁ ଏବଂ ଏବେ ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁ ମଧ୍ୟ ଦୁଇ ସପ୍ତାହ ଧରି ନିଖୋଜ।ଏନେଇ ଚୀନର ବୈଦେଶିକ ମନ୍ତ୍ରଣାଳୟ କିମ୍ବା ପ୍ରତିରକ୍ଷା ମନ୍ତ୍ରଣାଳୟ ତରଫରୁ କିଛି ପ୍ରତିକ୍ରିୟା ପ୍ରକାଶ ପାଇନାହିଁ। ଟୋକିଓରେ ଥିବା ଜାପାନ ଦୂତାବାସ ପକ୍ଷରୁ ମଧ୍ୟ ଅଧିକ କିଛି କୁହାଯାଇ ନାହିଁ। ତେବେ, ସନ୍ଦେହ କରାଯାଉଛି ଯେ ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁ ଏବେ ଗୃହବନ୍ଦୀ। ଗୁରୁବାର ଅର୍ଥାତ ସେପ୍ଟେମ୍ବର ୧୪ ତାରିଖରେ ରଏଟର ସମ୍ବାଦ ପ୍ରସାରଣ କଲା ଯେ ଭିଏତନାମର ପ୍ରତିରକ୍ଷା ମନ୍ତ୍ରଣାଳୟର ଏକ ଉଚ୍ଚ ସ୍ତରୀୟ ସହିତ ସାକ୍ଷାତ ଆଲୋଚନାକୁ ହଠାତ ବାତିଲ କରିଦେଲେ ଚୀନ ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁ। ସେ ଶେଷ ଥର ପାଇଁ ଅଗଷ୍ଟ ୨୯ ତାରିଖରେ ବେଜିଂରେ ଦେଖାଦେଇଥିଲେ। ସେତେବେଳେ ସେ ଆଫ୍ରିକୀୟ ରାଷ୍ଟ୍ରଗୋଷ୍ଠୀର ଏକ ନିରାପତ୍ତା ସମ୍ମିଳନୀରେ ଉଦବୋଧନ ଦେଇଥିଲେ। ତା’ପରଠାରୁ ସେ ଆଉ ସାଧାରଣରେ ଦେଖାଯାଇ ନାହାନ୍ତି।ଫାଇନାନ୍ସିଆଲ୍‌ ଟାଇମ୍ସ ଅନୁସାରେ ଲି’ଙ୍କ ବିରୋଧରେ ଏବେ ତଦନ୍ତ ଚାଲିଛି। କିନ୍ତୁ କି ପ୍ରକାର ତଦନ୍ତ ସେ ନେଇ କୌଣସି ପକ୍ଷରୁ କିଛି ସ୍ପଷ୍ଟ ସୂଚନା ନାହିଁ। ସେହିଭଳି ସିଙ୍ଗାପୁର ନେସେନାର କେଉଁ କର୍ମକର୍ତ୍ତାଙ୍କ ସହିତ ଲି’ଙ୍କର ଭେଟିବାର ଥିଲା ତାହା ମଧ୍ୟ ସ୍ପଷ୍ଟ ହୋଇନାହିଁ। ତେବେ ସିଙ୍ଗାପୁର ଗଣମାଧ୍ୟମରେ ପ୍ରକାଶ ପାଇଥିବା ସୂଚନା ଅନୁସାରେ ସିଙ୍ଗାପୁର ନୌସେନାର ରିଅର ଆଡମିରାଲ ସିନ୍‌ ୱାତ୍‌ ସେପ୍ଟେମ୍ବର ୪-୯ ତାରିଖ ମଧ୍ୟରେ ବେଜିଂରେ ଥିଲେ ଏବଂ ଚୀନ ନୌସେନାର କମାଣ୍ଡର ଡୋଙ୍ଗ ଜୁ ଏବଂ ଅନ୍ୟ କାର୍ଯ୍ୟକର୍ତ୍ତାଙ୍କ ସହିତ ସାକ୍ଷାତ ଆଲୋଚନା କରିଥିଲେ। ମାତ୍ର, ସେ ଚୀନର ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁଙ୍କ ସହିତ ଭେଟିବା ନେଇ ସିଙ୍ଗାପୁର ଗଣମାଧ୍ୟମରେ କୌଣସି ସୂଚନା ନାହିଁ।ଏଠାରେ ସୂଚନାଯୋଗ୍ୟ ଯେ କେଇ ମାସ ଧରି କାର୍ଯ୍ୟରୁ ଅନ୍ତର ରହିବା ପରେ ଗତ ଜୁଲାଇ ମାସରେ ଚୀନ ରାଷ୍ଟ୍ରପତି ଜି ଜିନ୍‌ପିଙ୍ଗ ବୈଦେଶିକ ମନ୍ତ୍ରୀ କିନ୍‌ ଗାଙ୍ଗଙ୍କ ସ୍ଥାନରେ ନୂଆ ମନ୍ତ୍ରୀ ନିଯୁକ୍ତ କରିଥିଲେ। ଠିକ ସେହିପରି ଚୀନ ସେନା ଜନ ମୁକ୍ତି ବାହିନୀ ବା ପିଏଲଏର ସମ୍ଭ୍ରାନ୍ତ ରକେଟ୍‌ ଫୋର୍ସର ଦୁଇ ଜଣ ଉଚ୍ଚ ସ୍ତରୀୟ କମାଣ୍ଡରଙ୍କୁ ମଧ୍ୟ ଅବ୍ୟାହତି ଦିଆଯାଇଛି। ଏହି ପୃଷ୍ଠଭୂମିରେ ଭାରତରେ ଅନୁଷ୍ଠିତ ହୋଇଥିବା ଜି-୨୦ ଏବଂ ପୂର୍ବରୁ ଦକ୍ଷିଣ ଆଫ୍ରିକାରେ ଅନୁଷ୍ଠିତ ହୋଇଥିବା ବ୍ରିକ୍ସ ବୈଠକରେ ଚୀନ ରାଷ୍ଟ୍ରପତି ଜି ଜିନିପିଙ୍ଗ ଯୋଗଦେଇ ନଥିଲେ। ଏସବୁ ଘଟଣାକୁ ନେଇ ଚୀନ୍‌ ସରକାର ବା ରାଜନୀତିରେ କିଛି ହଟଚମଟ ଘଟୁଥିବା ସନ୍ଦେହ କରାଯାଉଛି।