ଅଗଷ୍ଟା ୱେଷ୍ଟଲ୍ୟାଣ୍ଡ ଦୁର୍ନୀତି: ଅଭିଯୁକ୍ତ ମିସେଲ ଜେଲ୍‌ରୁ ମୁକ୍ତ, ପୃଥକ ମାମଲାରେ ସିବିଆଇ କଷ୍ଟଡିରେ ରହିବେ

ଦିଲ୍ଲୀର ରାଉଜ୍ ଆଭେନ୍ୟୁ କୋର୍ଟ ଶନିବାର ଦିନ ଅଗଷ୍ଟା ୱେଷ୍ଟଲ୍ୟାଣ୍ଡ ଭିଭିଆଇପି ହେଲିକପ୍ଟର ଚୁକ୍ତି ମାମଲାରେ ରାୟ ଦେଇଛନ୍ତି। ମାମଲା ସହିତ ଜଡିତ ମନି ଲଣ୍ଡରିଂ ମାମଲାରେ ବ୍ରିଟିଶ ନାଗରିକ କ୍ରିଷ୍ଟିଆନ୍ ମିସେଲ୍ ଜେମ୍ସଙ୍କୁ ଜେଲରୁ ମୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ। ତେବେ ସେ ଅନ୍ୟ ଏକ ପୃଥକ ମାମଲାରେ ସିବିଆଇ କଷ୍ଟଡିରେ ରହିବେ।

କୋର୍ଟ କହିଛନ୍ତି, ଯଦି ତାଙ୍କ ବିରୁଦ୍ଧରେ ଅନ୍ୟ କୌଣସି ମାମଲା ବିଚାରାଧୀନ ନାହିଁ, ତେବେ ତାଙ୍କୁ ଡିସେମ୍ବର ୨୧ରେ ମୁକ୍ତ କରାଯିବା ଉଚିତ। ସ୍ୱତନ୍ତ୍ର ବିଚାରପତି (ସିବିଆଇ) ସଞ୍ଜୟ ଜିନ୍ଦଲ ସିଆରପିସିର ଧାରା ୪୩୬ଏ ର ବ୍ୟବସ୍ଥା ଅନୁଯାୟୀ ଏହି ନିର୍ଦ୍ଦେଶ ଦେଇଛନ୍ତି। ବିଚାରପତି କହିଛନ୍ତି, ସିଆରପିସିର ଧାରା ୪୩୬ଏ ର ଦ୍ୱିତୀୟ ବ୍ୟବସ୍ଥା ଅନୁଯାୟୀ, ଅଭିଯୁକ୍ତଙ୍କୁ ଏହି ମାମଲାରେ ୨୧ ଡିସେମ୍ବର ୨୦୨୫ ପରେ ହେପାଜତରେ ରଖାଯାଇପାରିବ ନାହିଁ।

ଉଲ୍ଳେଖନୀୟ ଯେ, ସିଆରପିସିର ଧାରା ୪୩୬ଏ ର ଦ୍ୱିତୀୟ ସର୍ତ୍ତାବଳୀରେ କୁହାଯାଇଛି ଯେ ଜଣେ ବ୍ୟକ୍ତିଙ୍କୁ ତଦନ୍ତ, ପଚରାଉଚରା କିମ୍ବା ବିଚାର ସମୟରେ ଅପରାଧର ସର୍ବାଧିକ ସର୍ତ୍ତାବଳୀଠାରୁ ଅଧିକ ସମୟ ପାଇଁ ଅଟକ ରଖାଯାଇପାରିବ ନାହିଁ। ମିସେଲ ତାଙ୍କ ଆବେଦନରେ ଉଲ୍ଲେଖ କରିଛନ୍ତି ଯେ, ମନି ଲଣ୍ଡରିଂ ମାମଲାରେ ସର୍ବାଧିକ ସାତ ବର୍ଷର ସର୍ତ୍ତାବଳୀ ପୂରଣ କରିଛନ୍ତି ଏବଂ ସାତ ବର୍ଷ ଧରି ହାଜତରେ ଅଛନ୍ତି। କୋର୍ଟ କହିଛନ୍ତି, ଯଦି ତାଙ୍କୁ ଅନ୍ୟ କୌଣସି ମାମଲାରେ ଆବଶ୍ୟକ ନହୁଏ, ତେବେ ତାଙ୍କୁ ମୁକ୍ତ କରାଯିବା ଉଚିତ। କୋର୍ଟ ଜେଲ କର୍ତ୍ତୃପକ୍ଷଙ୍କୁ ସିଆରପିସିର ଧାରା ୪୩୬ଏର ଦ୍ୱିତୀୟ ସର୍ତ୍ତାବଳୀ ଅନୁଯାୟୀ ସମସ୍ତ ଆବଶ୍ୟକୀୟ ପ୍ରକ୍ରିୟା ସହିତ ତାଙ୍କର ମୁକ୍ତି ସୁନିଶ୍ଚିତ କରିବାକୁ ନିର୍ଦ୍ଦେଶ ଦେଇଛନ୍ତି।

ମିସେଲଙ୍କୁ ସୁପ୍ରିମକୋର୍ଟ ସିବିଆଇ ମାମଲାରେ ଓ ଦିଲ୍ଲୀ ହାଇକୋର୍ଟ ଇଡି ମାମଲାରେ ବେଲ୍ ଦେଇଥିଲେ। ବେଲ୍‌ସର୍ତ୍ତରେ ପ୍ରତ୍ୟେକ ମାମଲାରେ ୫ ଲକ୍ଷ ଟଙ୍କାର ବଣ୍ଡ ଓ ପାସପୋର୍ଟ ସରେଣ୍ଡର କରିବା ସାମିଲ ଥିଲା, କିନ୍ତୁ ସେ ବଣ୍ଡ ଜମା କରିଥିଲେ ଓ କଷ୍ଟଡି ବେଳେ ତାଙ୍କର ପାସପୋର୍ଟ ଇନଭାଲିଡ୍ ହୋଇଯାଇଥିଲା। ସିବିଆଇ ଏହି ମାମଲାରେ ସିସେଲଙ୍କ ଆବେଦନ ଉପରେ ଶନିବାର ସକାଳେ ଶୁଣାଣି କରିଛି। କୋର୍ଟ ସିବିଆଇକୁ ଜବାବ ମାଗିଛନ୍ତି ଓ ମାମଲାରେ ଆଗାମୀ ଶୁଣାଣି ପାଇଁ ୨୨ ଡିସେମ୍ବରକୁ ସୂଚୀବଦ୍ଧ କରି ଦିଆଯାଇଛି। ମିସେଲ କୋର୍ଟରେ ଲିଖିତ ଭାବରେ କହିଛନ୍ତି, ଯଦି ମୁକ୍ତ କରି ଦିଆଯିବ ତେବେ ସେ ବାକି ଟ୍ରାଏଲରେ ଭାଗନେବେ। ତାଙ୍କ ଓକିଲ କୋର୍ଟରେ କହିଛନ୍ତି, ଦୁଇଟି ତଦନ୍ତକାରୀ ଏଜେନ୍ସି ଗତ ୧୨ ବର୍ଷ ହେବ ମାମଲାର ଯାଞ୍ଚ କରୁଛନ୍ତି। ମୋର କ୍ଲାଏଣ୍ଟ ୭ ବର୍ଷ ପରେ କଷ୍ଟଡିରେ ଅଛନ୍ତି। ବେଲ୍ ମିଳିବା ପରେ ସେ ଘରକୁ ଯାଇ ପାରିବେନି। ଏହା ନ୍ୟାୟର ପରିହାସ।’ କୋର୍ଟ ବାହାରେ ମିଡିଆ ସହ କଥା ହୋଇ ମିସେଲ କହିଛନ୍ତି,ମୁଁ ଶୁଣାଣିର ମଜା ନେଉଛି।’ ଉଲ୍ଲେଖନୀୟ ଯେ, ମିସେଲଙ୍କୁ ଦୁବାଇରୁ ୪ ଡିସେମ୍ବର ୨୦୧୮ ରେ ପ୍ରତ୍ୟର୍ପଣ କରାଯାଇଥିଲା। ସିବିଆଇ ତାଙ୍କୁ କଷ୍ଟଡିରେ ନେଇଛି। ଏହାପରେ ଇଡି ୨୨ ଡିସେମ୍ବର ୨୦୧୮ରେ ତାଙ୍କୁ ଗିରଫ କରାଯାଇଥିଲା।