ଜରଡା ଥାନା ଆକ୍ରମଣ ମାମଲା: ବହୁରାଜ୍ୟ ଛାପାମାରିରେ ମୁଖ୍ୟ ଅଭିଯୁକ୍ତ ଗିରଫ

 ବହୁତ ଦିନର ବ୍ୟବଧାନ ପରେ ଜରଡା ଥାନାରେ ରୁଜୁ ହୋଇଥିବା ଆକ୍ରମଣ ମାମଲାରେ ପୁଲିସ ଏକ ବଡ଼ ସଫଳତା ହାସଲ କରିଛି। ବହୁରାଜ୍ୟରେ ସମନ୍ୱିତ ଛାପାମାରି କରି ପୁଲିସ ମୁଖ୍ୟ ଅଭିଯୁକ୍ତ ମନୋଜ ଦାସ (୩୬)ଙ୍କୁ ଗିରଫ କରିଛି।ପୁଲିସ ସୂଚନାନୁସାରେ, ଜରଡା ଥାନା କେସ ନଂ-୧୦୧, ତା. ୨୧.୦୩.୨୦୨୬ ରେ ଧାରା ୩୩୨(ବି)/୧୧୮(୨)/୧୦୯ ବିଏନଏସ ଓ ଅସ୍ତ୍ର ଆଇନ ଧାରା-୨୭ ଅନୁଯାୟୀ ମାମଲା ରୁଜୁ ହୋଇଥିଲା। ଅଭିଯୋଗକାରୀ କାରି ଡମ୍ବୁରୁ (୫୦), ଶୋଳାଭାଗପେଣ୍ଠୋ ଗ୍ରାମର ବାସିନ୍ଦା, ତାଙ୍କ ଝିଅଙ୍କୁ ଅଜଣା ବ୍ୟକ୍ତି ହତ୍ୟା ଚେଷ୍ଟା ସଦୃଶ ଆକ୍ରମଣ କରିଥିବା ନେଇ ଅଭିଯୋଗ କରିଥିଲେ। ତଦନ୍ତକାଳୀନେ ପ୍ରକାଶ ପାଇଥିଲା ଯେ ଅଭିଯୁକ୍ତ ମନୋଜ ଦାସ ଆନ୍ଧ୍ର ପ୍ରଦେଶର ଓଙ୍ଗୋଲେରେ ଥିବା ଏକ ଚିଙ୍ଗୁଡି ଫ୍ୟାକ୍ଟରୀରେ କାମ କରୁଥିଲେ। ସେଠାରେ ପୀଡିତାଙ୍କ ସହ ପରିଚୟ ହୋଇଥିଲା ଏବଂ ବିବାହ ପ୍ରସ୍ତାବ ଦେଇଥିଲେ। କିନ୍ତୁ ସେ ପୂର୍ବରୁ ବିବାହିତ ବୋଲି ଜାଣି ପୀଡିତା ମନା କରିଥିଲେ। ପରେ ଉଭୟଙ୍କ ମଧ୍ୟରେ ସମ୍ପର୍କ ଗଢ଼ିଉଠିଥିଲେ ମଧ୍ୟ ପରିବାର ପକ୍ଷରୁ ଏହାକୁ ବିରୋଧ କରାଯାଇଥିଲା। ପରେ ପୀଡିତାଙ୍କ ବିବାହ ଅନ୍ୟତ୍ର ନିର୍ଦ୍ଧାରିତ ହେବାରୁ ଅଭିଯୁକ୍ତ କ୍ରୋଧିତ ହୋଇ ୨୦.୦୩.୨୦୨୬ ସନ୍ଧ୍ୟାରେ ଗ୍ରାମକୁ ଆସି ୨୧.୦୩.୨୦୨୬ ରେ ଘଟଣା ଘଟାଇଥିବା ତଦନ୍ତରୁ ଜଣାପଡ଼ିଛି। ଆହତ ପୀଡିତାଙ୍କୁ ପ୍ରଥମେ ପାତ୍ରପୁର ହସ୍ପିଟାଲରେ ଭର୍ତ୍ତି କରାଯାଇଥିଲା ଏବଂ ପରେ ଗୁରୁତର ଅବସ୍ଥାରେ ବ୍ରହ୍ମପୁର ଏମକେସିଜି କୁ ସ୍ଥାନାନ୍ତର କରାଯାଇଥିଲା। ଘଟଣାକୁ ଗୁରୁତ୍ୱ ଦେଇ ପୁଲିସ ଦୁଇଟି ବିଶେଷ ଦଳ ଗଠନ କରିଥିଲା। ଏକ ଦଳ କନ୍ଧମାଳ ଜିଲ୍ଲାରେ ଓ ଅନ୍ୟ ଦଳ କଟକ, ଢେଙ୍କାନାଳ ଓ ଭୁବନେଶ୍ୱରରେ ଛାପାମାରି କରିଥିଲେ। ପରବର୍ତ୍ତୀ ସୂଚନା ଆଧାରରେ ତଦନ୍ତ ଜମ୍ମୁ-କାଶ୍ମୀର ଓ ମହାରାଷ୍ଟ୍ର ପର୍ଯ୍ୟନ୍ତ ବିସ୍ତାର କରାଯାଇଥିଲା। ଶେଷରେ ୧୨/୧୩ ଏପ୍ରିଲ ରାତିରେ ପୁନେ ସହରରେ ସ୍ଥାନୀୟ ପୁଲିସ ସହଯୋଗରେ ଛାପାମାରି କରି ଅଭିଯୁକ୍ତଙ୍କୁ ଗିରଫ କରାଯାଇଥିଲା। ଗିରଫ ପରେ ଅଭିଯୁକ୍ତଙ୍କୁ ପୁଣେର ଜେଏମଏଫସି ଆଦାଲତରେ ଉପସ୍ଥାପନ କରାଯାଇ ଟ୍ରାନ୍ଜିଟ୍ ରିମାଣ୍ଡରେ ଓଡ଼ିଶାକୁ ଆଣାଯାଇଥିଲା। ପରେ ପାତ୍ରପୁର ଜେଏମଏଫସି ଆଦାଲତରେ ଉପସ୍ଥାପନ କରାଯାଇଛି। ପୁଲିସ ଅଭିଯୁକ୍ତଙ୍କ ଠାରୁ ଏକ ହୋଣ୍ଡା ୟୁନିକର୍ଣ୍ଣ ମୋଟରସାଇକେଲ, ଦୁଇଟି ମୋବାଇଲ ଫୋନ, ହେଲମେଟ, ଆଧାର କାର୍ଡର ନକଲ ଓ ଘଟଣାରେ ବ୍ୟବହୃତ ଛୁରୀ ଖୋଲ ଜବତ କରିଛି। ଏହି ମାମଲାର ତଦନ୍ତ ଚାଲୁ ରହିଛି ବୋଲି ପୁଲିସ ପକ୍ଷରୁ ସୂଚନା ମିଳିଛି।