ଚୀନ୍‌ର ଏକ କୋଇଲା ଖଣିରେ ଭୟଙ୍କର ବିସ୍ଫୋରଣ,

ଚୀନର ଉତ୍ତର ଅଂଚଳର ଶାନସିରେ ଏକ କୋଇଲା ଖଣିରେ ଏକ ଭୟଙ୍କର ଗ୍ୟାସ ବିସ୍ଫୋରଣରେ ଅତି କମରେ ୯୦ ଜଣଙ୍କର ମୃତ୍ୟୁ ହୋଇଛି। ଏହାକୁ ୨୦୦୯ ପର ଠାରୁ ଚୀନର ସବୁଠାରୁ ବଡ଼ ଏବଂ ଭୟଙ୍କର ଖଣି ଦୁର୍ଘଟଣା ବୋଲି ବିବେଚନା କରାଯାଉଛି। ସରକାରୀ ଗଣମାଧ୍ୟମ ଜିନହୁଆ ଅନୁଯାୟୀ, ଏହି ଦୁର୍ଘଟଣା ଗତକାଲି (ଶୁକ୍ରବାର) ବିଳମ୍ବିତ ରାତିରେ କିନୟୁଆନ କାଉଣ୍ଟିର ଲିଉସେନୟୁ କୋଇଲା ଖଣିରେ ଘଟିଛି।

ସେତେବେଳେ ସେଠାରେ ୨୪୭ ଜଣ ଶ୍ରମିକ କାମ କରୁଥିଲେ। କର୍ପୋରେଟ୍ ଡାଟାବେସ୍ କିଚାଚା ଅନୁଯାୟୀ, ଖଣିଟି ଶାନସି ଟୋଙ୍ଗଝୋଉ ଗ୍ରୁପ୍ ଲିଉସେନଉ କୋଇଲା ଶିଳ୍ପ ଦ୍ୱାରା ପରିଚାଳିତ ହେଉଥିଲା। ଏହି କମ୍ପାନୀଟି ୨୦୧୦ ରେ ପ୍ରତିଷ୍ଠିତ ହୋଇଥିଲା ଏବଂ ଏହା ଶାନସି ଟୋଙ୍ଗଝୋଉ କୋଇଲା କୋକିଂ ଗ୍ରୁପ୍ ଦ୍ୱାରା ନିୟନ୍ତ୍ରିତ।

ସ୍ଥାନୀୟ ଜରୁରୀକାଳୀନ ପରିଚାଳନା କର୍ତ୍ତୃପକ୍ଷ କହିଛନ୍ତି ଯେ, ଦୁର୍ଘଟଣା ପରେ ଏକ ବଡ଼ ଧରଣର ଉଦ୍ଧାର ଏବଂ ରିଲିଫ୍ ଅଭିଯାନ ଚାଲିଛି। ବିସ୍ଫୋରଣର କାରଣ କଣ ତାହା ଖୋଜା ଚାଲିଛି। ଶାନସି ପ୍ରଦେଶକୁ ଚୀନର ସର୍ବବୃହତ କୋଇଲା ଖଣି ଅଞ୍ଚଳ ଭାବରେ ବିବେଚନା କରାଯାଏ ଏବଂ ଏଠାରେ ବହୁ ସଂଖ୍ୟକ କୋଇଲା ଖଣି ଅଛି।

ରାଷ୍ଟ୍ରପତି ସି ଜିନପିଙ୍ଗ କଣ କହିଛନ୍ତି ?

ଚୀନ ରାଷ୍ଟ୍ରପତି ସି ଜିନପିଙ୍ଗ ଆହତଙ୍କ ଚିକିତ୍ସା ଏବଂ ଉଦ୍ଧାରରେ କୌଣସି ଅଭାବ ନହେବା ନିଶ୍ଚିତ କରିବାକୁ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଛନ୍ତି। ସେ ଦୁର୍ଘଟଣାର ପୁଙ୍ଖାନୁପୁଙ୍ଖ ତଦନ୍ତ ଏବଂ ଦାୟୀଙ୍କ ବିରୁଦ୍ଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି। ଚୀନର ପ୍ରଧାନମନ୍ତ୍ରୀ ଲି କେକିଆଙ୍ଗ ମଧ୍ୟ ସମୟୋଚିତ, ସଠିକ୍ ସୂଚନା ଏବଂ ଦାୟିତ୍ୱ ସ୍ଥିର କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି। ଜିନହୁଆ ଅନୁଯାୟୀ, ଖଣି କାର୍ଯ୍ୟରେ ସାମିଲ କମ୍ପାନୀ ଅଧିକାରୀମାନଙ୍କୁ ଅଟକ ରଖାଯାଇଛି।

ପୂର୍ବରୁ ବଡ଼ ଦୁର୍ଘଟଣା ଘଟିଛି…

ଅତୀତରେ ଚୀନର କୋଇଲା ଖଣିରେ ସୁରକ୍ଷା ମାନଦଣ୍ଡ ଉପରେ ଗମ୍ଭୀର ପ୍ରଶ୍ନ ଉଠିଛି। ତଥାପି, ୨୦୦୦ ପରେ, ସରକାର ନିୟମକୁ କଡ଼ାକଡ଼ି କରିଥିଲେ, ଯାହା ଦୁର୍ଘଟଣାକୁ ହ୍ରାସ କରିଥିଲା। ୨୦୦୯ ମସିହାରେ ହେଲଙ୍ଗଜିଆଙ୍ଗ ପ୍ରଦେଶରେ ଏକ କୋଇଲା ଏବଂ ଗ୍ୟାସ ବିସ୍ଫୋରଣରେ ୧୦୮ ଜଣଙ୍କର ମୃତ୍ୟୁ ହୋଇଥିଲା ଏବଂ ୧୩୩ ଜଣ ଆହତ ହୋଇଥିଲେ ।