ଆମେରିକା ଗସ୍ତରେ ଯିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି

ନୂଆଦିଲ୍ଲୀ, ୩୦/୦୬: ଆମେରିକାରେ ନିଯୁକ୍ତ ଭାରତୀୟ ରାଷ୍ଟ୍ରଦୂତ ସର୍ଜିଓ ଗୋର୍ କହିଛନ୍ତି ଯେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚଳିତ ବର୍ଷ ଡିସେମ୍ବରରେ ଆମେରିକା ଗସ୍ତ କରିବେ। ଏହି ଗସ୍ତ ମୁଖ୍ୟତଃ ଜି-୨୦ ନେତାଙ୍କ ଶିଖର ସମ୍ମିଳନୀରେ ଯୋଗ ଦେବା ପାଇଁ ହେବ। ଚଳିତ ବର୍ଷ ପ୍ରଥମ ଥର ଆମେରିକାରେ ଜି-୨୦ ଆୟୋଜନ ହେବ।

ରାଷ୍ଟ୍ରଦୂତ ଗୋର୍ ଆଜି ଏକ କାର୍ଯ୍ୟକ୍ରମରେ କହିଛନ୍ତି, “ସେକ୍ରେଟାରୀ ମାର୍କୋ ରୁବିଓ ପ୍ରଧାନମନ୍ତ୍ରୀ ମୋଦିଙ୍କୁ ଭେଟି ନିମନ୍ତ୍ରଣ ଦେଇଛନ୍ତି। ଆମେ ତାଙ୍କୁ ପୁଣି ଥରେ ଆମେରିକାରେ ସ୍ୱାଗତ କରିବାକୁ ଚାହୁଁଛୁ। ମୁଁ ଜାଣେ ଯେ ସେ ଡିସେମ୍ବରରେ ଜି-୨୦ ପାଇଁ ଆସୁଛନ୍ତି।” ମେ’ ୨୩ ରୁ ୨୬ ତାରିଖ ପର୍ଯ୍ୟନ୍ତ ରୁବିଓଙ୍କ ଭାରତ ଗସ୍ତ ସମୟରେ ମୋଦିଙ୍କୁ ନିମନ୍ତ୍ରଣ କରାଯାଇଥିଲା।୨୦୨୬ ଜି-୨୦ ନେତାଙ୍କ ଶିଖର ସମ୍ମିଳନୀ ଡିସେମ୍ବର ୧୪ ଓ ୧୫ ତାରିଖରେ ଫ୍ଲୋରିଡାର ମିଆମିରେ ଅନୁଷ୍ଠିତ ହେବ। ଏହା ୨୦୦୯ ପରେ ଆମେରିକାରେ ଜି-୨୦ ନେତାଙ୍କ ଶିଖର ସମ୍ମିଳନୀର ପ୍ରଥମ ଆୟୋଜନ ହେବ। ଏହି ସମ୍ମିଳନୀରେ ବିଶ୍ୱର ପ୍ରମୁଖ ଅର୍ଥନୀତିର ନେତାମାନେ ଯୋଗଦେବେ ଏବଂ ବିଭିନ୍ନ ବିଷୟ ଉପରେ ଆଲୋଚନା କରିବେ।

ପ୍ରଧାନମନ୍ତ୍ରୀ ମୋଦିଙ୍କ ଏହି ସମ୍ଭାବ୍ୟ ଗସ୍ତ ଦୁଇ ଦେଶ ମଧ୍ୟରେ ବନ୍ଧୁତ୍ୱପୂର୍ଣ୍ଣ ସମ୍ପର୍କକୁ ଆହୁରି ମଜବୁତ୍ କରିବ ବୋଲି ଆଶା କରାଯାଉଛି। ପ୍ରଧାନମନ୍ତ୍ରୀ ମୋଦିଙ୍କ ଆମେରିକା ଗସ୍ତ ସମୟରେ ଦ୍ୱିପାକ୍ଷିକ ବୈଠକ, ବାଣିଜ୍ୟ, ପ୍ରତିରକ୍ଷା, ପ୍ରଯୁକ୍ତି ଓ ଜଳବାୟୁ ପରିବର୍ତ୍ତନ ପରି ଗୁରୁତ୍ୱପୂର୍ଣ୍ଣ ବିଷୟରେ ଆଲୋଚନା ହେବ ବୋଲି ଆଶା କରାଯାଉଛି।

ସୂଚନାଯୋଗ୍ୟ, ଗତ ଦୁଇ ଦିନ ପୂର୍ବରୁ ଆମେରିକାର ବୈଦେଶିକ ସଚିବ ମାର୍କୋ ରୁବିଓ କହିଥିଲେ ଯେ, ଆସନ୍ତା ବର୍ଷ ପ୍ରଥମାର୍ଦ୍ଧରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଆସିବେ।