ଚାଲିଥିଲା ପୂଜା, ହଠାତ ବନ୍ଧୁକ ଧରି ଗୁଳି ଚଳାଇଲେ ନାବାଳକ, ଚୂଡ଼ାମଣି ସାମୁଦ୍ରିକ ଥାନା କର୍ମଚାରୀ…

ବାସୁଦେବପୁର ବ୍ଲକ ଶାଶୁ ଭୁଆସୁଣୀ ଗ୍ରାମରେ ବୁଧବାର ଅପରାହ୍ନରେ ଏକ ଅଭାବନୀୟ ଘଟଣା ଘଟିଛି। ଜଣେ ନାବାଳକଙ୍କ ଦ୍ୱାରା ହୋଇଥିବା ଗୁଳି ଚାଳନାରେ ଚୂଡାମଣି ଗ୍ରାମର ମାନସ ସେଠୀ ନାମକ ଜଣେ ଯୁବକ ଆହତ ହୋଇଛନ୍ତି।ସୂଚନା ଅନୁଯାୟୀ, ଶାଶୁ ଭୁଆସୁଣୀ ଗ୍ରାମର ଏକ ମନ୍ଦିରରେ ପୂଜାକାର୍ଯ୍ୟ ଚାଲିଥିବା ସମୟରେ ଏହି ଗୁଳିମାଡ଼ ହୋଇଥିଲା।

ଗୁଳିଟି ମାନସଙ୍କ ହାତରେ ବାଜିଥିଲା। ତାଙ୍କୁ ତୁରନ୍ତ ଉଦ୍ଧାର କରାଯାଇ ପ୍ରାଥମିକ ଚିକିତ୍ସା କରାଯାଇଛି ଏବଂ ବର୍ତ୍ତମାନ ସେ ସୁସ୍ଥ ଥିବା ଜଣାପଡ଼ିଛି। ଆହତ ମାନସ ସେଠୀ ଚୂଡାମଣି ସାମୁଦ୍ରିକ ଥାନାର ଜଣେ ନୂତନ ନିଯୁକ୍ତିପ୍ରାପ୍ତ କର୍ମଚାରୀ ବୋଲି ଜଣାପଡ଼ିଛି।

ଗୁଳି ଚାଳନା କରିଥିବା ନାବାଳକ ଜଣକ ଜଣେ ପୋଲିସ ଅଧିକାରୀଙ୍କ ସମ୍ପର୍କୀୟ ବୋଲି ଚର୍ଚ୍ଚା ହେଉଛି। ତେବେ ଜଣେ ନାବାଳକଙ୍କ ପାଖକୁ ବନ୍ଧୁକ କେଉଁଠାରୁ ଆସିଲା, ତାହା ଏବେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଅସାବଧାନତା କାରଣରୁ ଏହି ଗୁଳି ଫୁଟିଥିବା ପ୍ରାଥମିକ ଭାବେ ଅନୁମାନ କରାଯାଉଛି।

ଏ ସମ୍ପର୍କରେ ଚୂଡାମଣି ଆଇଆଇସି ବନାନୀ ବେହେରାଙ୍କୁ ପଚାରିବାରୁ ସେ କହିଛନ୍ତି ଯେ, ଏହି ଘଟଣା ବାବଦରେ ବର୍ତ୍ତମାନ ସୁଦ୍ଧା କୌଣସି ଲିଖିତ ଅଭିଯୋଗ ହୋଇନାହିଁ। ତଥାପି ପୋଲିସ ନିଜ ଆଡ଼ୁ ଘଟଣାର ପ୍ରାଥମିକ ତଦନ୍ତ ଆରମ୍ଭ କରିଛି। ନାବାଳକ ଜଣକ ବନ୍ଧୁକ କେଉଁଠୁ ପାଇଲେ ଏବଂ ତାହା କାହାର, ସେ ନେଇ ଅନୁସନ୍ଧାନ ଜାରି ରହିଛି।