ହୁଗୁଳି: ଦ୍ୱିତୀୟ ପର୍ଯ୍ୟାୟ ବିଧାନସଭା ନିର୍ବାଚନ ପୂର୍ବରୁ ପଶ୍ଚିମବଙ୍ଗରେ ରାଜନୈତିକ ଉତ୍ତେଜନା ବଢିବାରେ ଲାଗିଛି। ଏଥିରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଶନିବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ‘ହିଂସକ ବୟାନ’କୁ ନେଇ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ କରିବା କଥା କହିଛନ୍ତି। ରାଜ୍ୟରେ ପ୍ରଥମ ପର୍ଯ୍ୟାୟ ଭୋଟଗ୍ରହଣର ଦିନକ ପରେ ଏହି ଘଟଣା ସାମ୍ନାକୁ ଆସିଛି।
ଏହି ପର୍ଯ୍ୟାୟରେ ରେକର୍ଡ ମତଦାନ ହୋଇଛି, ଏଣୁ ରାଜନୈତିକ ପ୍ରତିଦ୍ୱନ୍ଦ୍ୱୀତାକୁ ଅଧିକ ତୀବ୍ର କରିଛି। ଦ୍ୱିତୀୟ ପର୍ଯ୍ୟାୟ ନିର୍ବାଚନ ଲାଗି ନିର୍ବାଚନ ପ୍ରଚାର ଏବେ ଚରମ ସୀମାକୁ ପହଞ୍ଚିଛି। ହୁଗୁଳିରେ ଏକ ଜନସଭାକୁ ସମ୍ବୋଧିତ କରି ମମତା ବାନାର୍ଜୀ ଶାହଙ୍କ ଭାଷଣର ସମାଲୋଚନା କରିଛନ୍ତି। ସେ କହିଛନ୍ତି ଯେ କେନ୍ଦ୍ର ଗୃହମନ୍ତ୍ରୀ ପଦବୀରେ ଥାଇ କେହି ଏପରି ଟିପ୍ପଣୀ କରିପାରେ ତାହା ଆମେ ଆଶା କରିନଥିଲୁ।
ସେ କହିଛନ୍ତି ଯେ ଆମେ ଅମିତ ଶାହଙ୍କ ‘ହିଂସକ ବୟାନ’ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ କରିବାକୁ ଯାଉଛୁ। ଜଣେ ଗୃହମନ୍ତ୍ରୀ ଭାବେ ସେ ଏପରି ଟିପ୍ପଣୀ କରିପାରିବେ ନାହିଁ। ବାନାର୍ଜୀଙ୍କ ଏହି ପ୍ରତିକ୍ରିୟା ଶାହଙ୍କ ଦ୍ୱାରା ଶୁକ୍ରବାର ଆରାମବାଗରେ ଅନୁଷ୍ଠିତ ଏକ ଜନସଭାରେ ଦେଇଥିବା ଚେତାବନୀ ପରେ ଆସିଛି। ଶାହ ନିର୍ବାଚନ ପରେ ତୃଣମୂଳ କଂଗ୍ରେସ ଗୁଣ୍ଡାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନର ଚେତାବନୀ ଦେଇଥିଲେ।
ଶାହଙ୍କ ଟିପ୍ପଣୀର ଉଲ୍ଲେଖ କରି ମମତା କହିଛନ୍ତି ଗୃହମନ୍ତ୍ରୀ କେଉଁଭଳି ଭାଷା ପ୍ରୟୋଗ କରୁଛନ୍ତି? ନିର୍ବାଚନ ପରେ ଲୋକଙ୍କୁ ଫାଶୀରେ ଟାଙ୍ଗିବା କଥା କହିବା କେବେବି ଗ୍ରହଣୀୟ ନୁହେଁ। ଏହି ମାନସିକତା ରଖି ବିଜେପି କେବେବି ବଙ୍ଗଳାରେ ନିର୍ବାଚନ ଜିତି ପାରିବ ନାହିଁ ବୋଲି ମମତା କହିଛନ୍ତି। ଶାହ କହିଥିଲେ ମୁଁ ଦିଦିଙ୍କ ଗୁଣ୍ଡାଙ୍କୁ ଚେତାବନୀ ଦେଉଛି ସେମାନେ ୨୯ ତାରିଖରେ ନିଜ ଘରୁ ପଦାକୁ ଯେପରି ନ ବାହାରନ୍ତି। ଯଦି ୨୯ ତାରିଖରେ ଆରାମବାଗ ଜନତାଙ୍କୁ କୌଣସି ସମସ୍ୟା ହୁଏ ତେବେ ୫ ତାରିଖ ପରେ ଆମେ ସେମାନଙ୍କୁ ଓଲଟା ଟଙ୍ଗେଇ ଦେବୁ। ଶାହଙ୍କ ଏହି ବୟାନରେ ରାଜ୍ୟର ଶାସକ ଦଳ କଡ଼ା ପ୍ରତିକ୍ରିୟା ଦେଇଛି।
More Stories
IASସ୍ତରରେ ବଡ଼ ଧରଣର ଅଦଳବଦଳ କଲେ ରାଜ୍ୟ ସରକାର
ନିର୍ବାଚନ ଆୟୋଗଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ, ସୁପ୍ରିମ୍ କୋର୍ଟଙ୍କ ଦ୍ୱାରସ୍ଥ ହେଲେ ମମତା ବାନାର୍ଜୀ
ଇଣ୍ଡୋନେସିଆକୁ ମିଳିଲା ପ୍ରଥମ ଏୟାରକ୍ରାଫ୍ଟ କ୍ୟାରିୟର