କେରଳକୁ ଦାଦନ ଖଟି ଯାଇଥିଲେ, କୁଅରୁ ଉଦ୍ଧାର ହେଲା ଶ୍ରମିକଙ୍କ ମୃତଦେହ: ଅର୍ଥ ଅଭାବ ଯୋଗୁ ଚିନ୍ତାରେ ପରିବାର

କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଗୁମିକିଆ ପଞ୍ଚାୟତ କୁନ୍ଦୁପାଙ୍ଗା ଅଞ୍ଚଳର ଜଣେ ଦାଦନ ଶ୍ରମିକଙ୍କ କେରଳରେ ମୃତ୍ୟୁ ହୋଇଥିବା ଜଣାପଡ଼ିଛି। ମୃତଦେହକୁ ନିଜ ଗ୍ରାମକୁ ଫେରାଇ ଆଣିବା ପାଇଁ ଲକ୍ଷାଧିକ ଟଙ୍କା ଆବଶ୍ୟକ ହେଉଥିବାରୁ ଅର୍ଥାଭାବ ବାଧକ ସାଜିଛି ଏବଂ ପରିବାରବର୍ଗ ଗଭୀର ଚିନ୍ତାରେ ପଡ଼ିଛନ୍ତି।

ମୃତକ ଜଣଙ୍କ ହେଲେ କୁନ୍ଦୁପାଙ୍ଗା ଗ୍ରାମର ୫୨ ବର୍ଷୀୟ ବିସୋଶ ଦିଗାଲ। ମୃତକଙ୍କ ପୁଅ ମୁନା ଦିଗାଲଙ୍କ ସୂଚନା ଅନୁଯାୟୀ, ଗ୍ରାମରେ କାମଧନ୍ଦା ନ ମିଳିବାରୁ ବିସୋଶ ଓ ତାଙ୍କ ପୁଅ ବହୁ ବର୍ଷ ହେବ କେରଳରେ ଦାଦନ ଖଟି ଆସୁଛନ୍ତି। ଗତ ରବିବାର ସକାଳେ ବିସୋଶ କେରଳର ଏର୍ଣ୍ଣାକୁଲମ ଜିଲା କୁରୁପ୍ପମ୍ ପଡ଼ି ଥାନା ରାୟମଙ୍ଗଲମ ଗ୍ରାମରେ ପହଞ୍ଚିଥିଲେ ଏବଂ ଦିନେ କିମ୍ବା ଦୁଇ ଦିନ ମଧ୍ୟରେ କାମରେ ଯୋଗଦେବାର ଥିଲା। କିନ୍ତୁ ରବିବାର ସନ୍ଧ୍ୟାରୁ ସେ ରହୁଥିବା ସ୍ଥାନରୁ ନିଖୋଜ ହୋଇଯାଇଥିଲେ।

ପୁଅ ମୁନା ବିଳମ୍ବିତ ରାତ୍ରି ପର୍ଯ୍ୟନ୍ତ ଖୋଜାଖୋଜି କରି ନପାଇବାରୁ ସେହିଦିନ ରାତିରେ ସ୍ଥାନୀୟ କୁରୁପ୍ପମ୍ ପଡ଼ି ଥାନାରେ ଏକ ଲିଖିତ ଅଭିଯୋଗ କରିଥିଲେ। ବୁଧବାର ସକାଳେ ଜଣେ ମହିଳା କୂଅରୁ ପାଣି ଆଣିବାକୁ ଯାଇଥିବା ସମୟରେ କୂଅ ଭିତରେ ଏକ ମୃତଦେହ ଭାସୁଥିବା ଦେଖି ପୋଲିସକୁ ଖବର ଦେଇଥିଲେ। ପୋଲିସ ଖବର ଦେବା ପରେ ମୁନା ସେଠାରେ ପହଞ୍ଚି ନିଜ ବାପାଙ୍କ ମୃତଦେହକୁ ଚିହ୍ନଟ କରିଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ କରାଇ ମୁନାଙ୍କୁ ହସ୍ତାନ୍ତର କରିଛି।

ତେବେ ବାପାଙ୍କ ମୃତଦେହକୁ ଗ୍ରାମକୁ ଆଣିବା ପାଇଁ ଟ୍ୟାକ୍ସି ଭଡ଼ା ବାବଦକୁ ପ୍ରାୟ ଦେଢ଼ ଲକ୍ଷ ଟଙ୍କା ଜମା କରିବାକୁ ପଡ଼ିବ ବୋଲି ଜଣାପଡ଼ିଛି। ନିଜେ ମଧ୍ୟ ସେଠାରେ ଦାଦନ ଶ୍ରମିକ ଭାବେ କାମ କରୁଥିବାରୁ ମୁନାଙ୍କ ପାଖରେ ଏତେ ପରିମାଣର ଅର୍ଥ ନାହିଁ। ଅର୍ଥ ଅଭାବରୁ ବାପାଙ୍କ ମୃତଦେହକୁ ଆଣିବା କିପରି ସମ୍ଭବ ହେବ, ସେନେଇ ପରିବାର ଓ ସମ୍ପର୍କୀୟମାନେ ଚିନ୍ତାରେ ଅଛନ୍ତି।