୧୩ କୋଟିରୁ ଅଧିକ ଟଙ୍କାର ଗଞ୍ଜେଇ ଜବତ, ପୋଲିସକୁ ଦେଖି ଡ୍ରାଇଭର

ସୁବର୍ଣ୍ଣପୁର ଜିଲା ସୁବଳୟା ପୋଲିସକୁ ମିଳିଛି ବଡ଼ ସଫଳତା। ଏକ କଣ୍ଟେନରରୁ ୧୨ କ୍ୱିଣ୍ଟାଲରୁ ଅଧିକ ଗଞ୍ଜେଇ ଯାହାର ଆନୁମାନିକ ମୂଲ୍ୟ ପ୍ରାୟ ୧୩ କୋଟି ଟଙ୍କାରୁ ଅଧିକ ହେବ ଜବତ କରିଛି ପୋଲିସ। ଜବତ କଣ୍ଟେନରର ନମ୍ବର ଏନ୍‌ଏଲ ୦୩ ଏଏ ୯୧୩୩ ବୋଲି ଜଣାପଡ଼ିଛି।
ସୂଚନା ଅନୁସାରେ, ଉକ୍ତ କଣ୍ଟେନରରେ ଗଞ୍ଜେଇ ଭର୍ତ୍ତି କରି କଦଳୀଗଡ଼ ପଟରୁ ବୀରମହାରାଜପୁର ଆଡ଼କୁ ଆସୁଥିଲା। କୌଣସି ସୂତ୍ରରୁ ଏ ସମ୍ପର୍କରେ ସୂଚନା ପାଇବା ପରେ ସୁବଳୟା ପୋଲିସ କଣ୍ଟେନରଟିକୁ ପିଛା କରିଥିଲା। ପୋଲିସକୁ ପିଛା କରୁଥିବା ଜାଣି ଡ୍ରାଇଭର ସୁବଳୟା-ବୀରମହାରାଜପୁର ରାସ୍ତାର ଗୋବିନ୍ଦପୁର ଛକ ନିକଟ ଶରଖଣ୍ଡି ଅଞ୍ଚଳରେ କଣ୍ଟେନରଟିକୁ ଛାଡ଼ି ଫେରାର ହୋଇଯାଇଥିଲା। ପୋଲିସ ଘଟଣାସ୍ଥଳରେ ପହଞ୍ଚି କଣ୍ଟେନରଟିକୁ ଜବତ କରି ଯାଞ୍ଚ କରିବାରୁ ସେଥିରୁ ବିପୁଳ ପରିମାଣର ଗଞ୍ଜେଇ ମିଳିଥିଲା। ଏହା ଦେଖି ପୋଲିସ ମୁଣ୍ଡ ଗୋଲ୍‌ ହୋଇଯାଇଥିଲା।

ମାଜିଷ୍ଟ୍ରେଟ ଭାବେ ଯୋଗଦେଇଥିବା ଅତିରିକ୍ତ କଲେକ୍ଟର ଅଜିତ ମିର୍ଦ୍ଧାଙ୍କ ଉପସ୍ଥିତିରେ ଜବତ ଗଞ୍ଜେଇର ଓଜନ କରାଯାଇଥିବା ବେଳେ ଏହାର ପରିମାଣ ୧୨ କ୍ୱିଣ୍ଟାଲରୁ ଅଧିକ ହେବ ବୋଲି ପୋଲିସ ସୂଚନା ଦେଇଛି।
ତେବେ କଣ୍ଟେନରରେ ଡ୍ରାଇଭର ସମେତ ଆଉ କେତେଜଣ ଥିଲେ, ସେ ସମ୍ପର୍କରେ ସ୍ପଷ୍ଟ ସୂଚନା ମିଳିନାହିଁ। ଏନେଇ ସୁବଳୟା ଥାନାରେ କେସ୍‌ ନଂ ୧୪୨/୨୬ରେ ମାମଲା ରୁଜୁ ହୋଇଛି। ଫେରାର ଡ୍ରାଇଭର ଓ ଏହି ଗଞ୍ଜେଇ ଚାଲାଣ ପଛରେ ଥିବା ଅନ୍ୟ ବ୍ୟକ୍ତିଙ୍କ ସମ୍ପର୍କରେ ଅଧିକ ତଦନ୍ତ ଜାରି ରହିଛି ବୋଲି ସୁବଳୟା ଥାନା ଭାରପ୍ରାପ୍ତ ଅଧିକାରୀ ସଞ୍ଜୀବ ବସ୍ତିଆ ପ୍ରକାଶ କରିଛନ୍ତି।