ବଲୁଚ ଆର୍ମି ଟାର୍ଗେଟରେ ଜାଫର ଏକ୍ସପ୍ରେସ, ବିସ୍ଫୋରଣରେ ଥରି ଉଠିଲା ପାକିସ୍ତାନ…

ଇସଲାମାବାଦ,୭।୧୦: ପାକିସ୍ତାନର ଜାଫର ଏକ୍ସପ୍ରେସ ଟ୍ରେନ ଉପରେ ପୁଣି ଥରେ ଆକ୍ରମଣ ହୋଇଛି। ବୋମା ବିସ୍ଫୋରଣରେ ଅନେକ ଯାତ୍ରୀ ଗୁରୁତର ଆହତ ହୋଇଛନ୍ତି ଏବଂ ଅନେକ କୋଚ ଲାଇନଚ୍ୟୁତ ହୋଇଛି। ବାଲୁଚ ଲିବରେସନ ଗାର୍ଡସ ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରିଛି। ବାଲୁଚ ଆର୍ମି ଟ୍ରାକରେ ଏକ ରିମୋଟ-କଣ୍ଟ୍ରୋଲ ଆଇଇଡି ବୋମା ଖଞ୍ଜିଥିଲା। ଏହି ବର୍ଷ ଜାଫର ଏକ୍ସପ୍ରେସ ଉପରେ ଏହା ତୃତୀୟ ବଡ଼ ଆକ୍ରମଣ।
ପିଟିଆଇର ଏକ ରିପୋର୍ଟ ଅନୁଯାୟୀ, ରାୱଲପିଣ୍ଡିରୁ କ୍ୱେଟା ଯାଉଥିବା ଜାଫର ଏକ୍ସପ୍ରେସ ଆଇଇଡି ବିସ୍ଫୋରଣ ଯୋଗୁ ଲାଇନଚ୍ୟୁତ ହୋଇଥିଲା। ଅନେକ ଯାତ୍ରୀ ଗୁରୁତର ଆହତ ହୋଇଥିଲେ। ସୁରକ୍ଷା କର୍ମୀ ତୁରନ୍ତ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ନିକଟସ୍ଥ ହସ୍ପିଟାଲକୁ ପଠାଯାଇଥିଲା।
ବାଲୁଚ ଲିବରେସନ ଆର୍ମି ଜାଫର ଏକ୍ସପ୍ରେସ ଉପରେ ଆକ୍ରମଣ ପାଇଁ ଦାୟୀ ବୋଲି ଦାବି କରିଛି। ଏକ ବିବୃତ୍ତିରେ କୁହାଯାଇଛି, ‘ମଙ୍ଗଳବାର, ବାଲୁଚ ଲିବରେସନ ଗାର୍ଡସର ସ୍ବାଧୀନତା ସଂଗ୍ରାମୀମାନେ ସୁଲତାନ କୋଟରେ ଆଇଇଡି ବିସ୍ଫୋରଣ ସହିତ ଜାଫର ଏକ୍ସପ୍ରେସକୁ ଟାର୍ଗେଟ କରିଥିଲେ। ପାକିସ୍ତାନୀ ସୈନିକମାନେ ଯାଉଥିବା ସମୟରେ ଟ୍ରେନଟି ଉପରେ ଆକ୍ରମଣ କରାଯାଇଥିଲା। ବିସ୍ଫୋରଣରେ ଅନେକ ପାକିସ୍ତାନୀ ସୈନିକଙ୍କ ମୃତ୍ୟୁ ଘଟିଥିଲା ଏବଂ ଅନେକ ଆହତ ହୋଇଥିଲେ।’ ବାଲୁଚ ଲିବରେସନ ଆର୍ମି ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି ଏବଂ ଭବିଷ୍ୟତରେ ସ୍ବାଧୀନତା ପାଇଁ ଏପରି ଅଧିକ ଅପରେସନ କରିବ ବୋଲି କହିଛି।’