ଖାଉଟି ଅଦାଲତରେ ଦଣ୍ଡିତ ହେଲେ ‘ମୁକେଶ ଏଣ୍ଟରପ୍ରାଇଜେସ’: ନୂଆ ଟିଭି ସହ…

 ଗ୍ରାହକଙ୍କୁ ସେବା ଯୋଗାଇବାରେ ଅବହେଳା କରିବା ଜୁନାଗଡ଼ର ଏକ ବ୍ୟବସାୟିକ ପ୍ରତିଷ୍ଠାନ ଓ ବିଶ୍ୱପ୍ରସିଦ୍ଧ ଟିଭି ନିର୍ମାତା ସଂସ୍ଥା ‘ସାମସଙ୍ଗ’କୁ ମହଙ୍ଗା ପଡ଼ିଛି। ୱାରେଣ୍ଟି ସମୟରେ ଟିଭି ମରାମତି ନକରି ଗ୍ରାହକଙ୍କୁ ହଇରାଣ କରିଥିବା ଅଭିଯୋଗରେ କଳାହାଣ୍ଡି ଜିଲା ଖାଉଟି ଅଦାଲତ ଉଭୟ ବିକ୍ରେତା ଓ ସଂସ୍ଥାକୁ ଦଣ୍ଡିତ କରିଛନ୍ତି।ଜୁନାଗଡ଼ ବ୍ଲକ ନୂଆଗୁଡା ଗ୍ରାମର ଉତ୍ତମ ଦାଶ ଗତ ଫେବୃଆରୀ ୨୦୨୩ରେ ଜୁନାଗଡ଼ସ୍ଥିତ ‘ମୁକେଶ ଏଣ୍ଟରପ୍ରାଇଜେସ’ରୁ ୫୦ ହଜାର ଟଙ୍କା ଦେଇ ଏକ ୫୫ ଇଞ୍ଚର ସାମସଙ୍ଗ ଏଲଇଡି ଟିଭି କିଣିଥିଲେ। କିଣିବାର ୯ ମାସ ପରେ ଟିଭିର ଡିସପ୍ଲେ ଖରାପ ହୋଇଯାଇଥିଲା। ପ୍ରଥମେ ସର୍ଭିସ ସେଣ୍ଟର ପକ୍ଷରୁ ନୂଆ ଡିସପ୍ଲେ ଲଗାଯାଇଥିଲେ ହେଁ, ମାତ୍ର ୩ ମାସ ପରେ ତାହା ପୁଣି ଅଚଳ ହୋଇପଡ଼ିଥିଲା।

ଅଭିଯୋଗକାରୀ ବାରମ୍ବାର ଦୋକାନ ମାଲିକ ମୁକେଶ ଅଗ୍ରୱାଲ ଓ ସର୍ଭିସ ସେଣ୍ଟରକୁ ଜଣାଇଥିଲେ ମଧ୍ୟ ସେମାନେ କୌଣସି ପଦକ୍ଷେପ ନନେଇ ଦିନ ଗଡ଼ାଇ ଚାଲିଥିଲେ। ଫଳରେ ଟିଭିର ୱାରେଣ୍ଟି ସମୟ ଶେଷ ହୋଇଯାଇଥିଲା। ପରବର୍ତ୍ତୀ ସମୟରେ ୱାରେଣ୍ଟି ଶେଷ ହୋଇଥିବା ଦର୍ଶାଇ ସର୍ଭିସ ସେଣ୍ଟର ଟଙ୍କା ଦାବି କରିଥିଲା। ଅସହାୟ ହୋଇ ଦାଶ ଜିଲା ଖାଉଟି ଅଦାଲତର ଦ୍ୱାରସ୍ଥ ହୋଇଥିଲେ।

ଅଦାଲତର ଅଧ୍ୟକ୍ଷ ଅଶ୍ୱିନୀ କୁମାର ପାତ୍ର ଓ ସଦସ୍ୟା ଜୋସ୍ନାରାଣୀ ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ମାମଲାର ବିଚାର କରି ଆଗାମୀ ୩୦ ଦିନ ମଧ୍ୟରେ ସେହି ବ୍ରାଣ୍ଡର ଏକ ନୂଆ ଟିଭି ଅଭିଯୋଗକାରୀଙ୍କୁ ପ୍ରଦାନ କରିବାକୁ ହେବ। ଯଦି ଟିଭି ବଦଳାଯାଏ ନାହିଁ, ତେବେ ୫୦ ହଜାର ଟଙ୍କା ସହ ୯% ସୁଧ ପ୍ରଦାନ କରିବାକୁ ପଡ଼ିବ। ଗ୍ରାହକଙ୍କୁ ହଇରାଣ କରିଥିବା ଯୋଗୁଁ ମୁକେଶ ଏଣ୍ଟରପ୍ରାଇଜେସ ୨୦ ହଜାର ଟଙ୍କା କ୍ଷତିପୂରଣ ଦେବେ। ଦୋକାନୀ, ଉତ୍ପାଦନକାରୀ ସଂସ୍ଥା ଓ ସର୍ଭିସ ପରିଚାଳକ ପ୍ରତ୍ୟେକ ୫ ହଜାର ହିସାବରେ ମୋଟ ୧୫ ହଜାର ଟଙ୍କା ପ୍ରଦାନ କରିବେ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି।

ଅଭିଯୋଗକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ପ୍ରଦୀପ କୁମାର ବିହାର ମାମଲା ପରିଚାଳନା କରୁଥିଲେ। ଏହି ରାୟ ପରେ ସାଧାରଣ ଖାଉଟିଙ୍କ ମଧ୍ୟରେ ନ୍ୟାୟ ପ୍ରତି ଆଶା ଓ ବିଶ୍ୱାସ ବୃଦ୍ଧି ପାଇଛି।