ପଡ଼ୋଶୀ ରାଜ୍ୟର କବାଡ଼ି ବ୍ୟବସାୟୀଙ୍କ ଆଧିପତ୍ୟ! ହାଇବା ବ୍ୟାଟେରି ଚୋରି ଘଟଣାରେ ପୋଲିସର ନିରବତାକୁ ନେଇ ପ୍ରଶ୍ନ

ଭବାନୀପାଟଣା ସହର ଓ ଏହାର ଆଖପାଖ ଅଞ୍ଚଳରେ ପଡ଼ୋଶୀ ରାଜ୍ୟରୁ ଆସି କବାଡ଼ି ବ୍ୟବସାୟ କରୁଥିବା କିଛି ବ୍ୟକ୍ତିଙ୍କ ଆଧିପତ୍ୟ ବଢ଼ିବା ସହିତ ଚୋରି ଘଟଣା ମଧ୍ୟ ବୃଦ୍ଧି ପାଉଥିବା ନେଇ ସାଧାରଣ ଲୋକଙ୍କ ମଧ୍ୟରେ ଚର୍ଚ୍ଚା ଜୋର ଧରିଛି। ବିଶେଷ କରି ଜଣେ ଶିଳ୍ପପତିଙ୍କ କ୍ୟାମ୍ପରୁ ୧୦ଟି ହାଇବା ବ୍ୟାଟେରି ଚୋରି ହେବା ଏବଂ ଏହା ପରେ ପୋଲିସର ତଦନ୍ତ ଗତିକୁ ନେଇ ଉଠିଥିବା ପ୍ରଶ୍ନ ବର୍ତ୍ତମାନ ସହରର ମୁଖ୍ୟ ଆଲୋଚ୍ୟ ବିଷୟ ପାଲଟିଛି।

ସୂଚନା ଅନୁଯାୟୀ, ଭବାନୀପାଟଣାର ବିଶିଷ୍ଟ ଶିଳ୍ପପତି ସୁଧୀର କୁମାର ପଣ୍ଡାଙ୍କ କ୍ୟାମ୍ପରୁ ପ୍ରାୟ ୧୦ଟି ହାଇବା ଗାଡ଼ିର ବ୍ୟାଟେରି ଚୋରି ହୋଇଥିଲା। ଏହି ଘଟଣାକୁ ନେଇ ସେ ଭବାନୀପାଟଣା ସଦର ଥାନାରେ ଲିଖିତ ଏତଲା ଦାଖଲ କରିଥିଲେ। ଏତଲା ସହ ବ୍ୟାଟେରିର କ୍ରୟ ସମ୍ବନ୍ଧୀୟ କାଗଜପତ୍ର ଓ ଅନ୍ୟାନ୍ୟ ପ୍ରମାଣ ମଧ୍ୟ ଦାଖଲ କରାଯାଇଥିବା ଜଣାପଡ଼ିଛି।

କିନ୍ତୁ ଅଭିଯୋଗ ହେବା ପରେ ମଧ୍ୟ ପୋଲିସର ତଦନ୍ତ ଆଶାନୁରୂପ ଗତିରେ ଆଗେଇ ନଥିବା ଅଭିଯୋଗ ହେଉଛି। ଆଶ୍ଚର୍ଯ୍ୟର ବିଷୟ, ଶିଳ୍ପପତି ନିଜସ୍ୱ ଉଦ୍ୟମ ଓ ଖୋଜଖବର ମାଧ୍ୟମରେ ଗୋଟିଏ ବ୍ୟାଟେରି ଉଦ୍ଧାର କରିଥିବା ବେଳେ ଉକ୍ତ ବ୍ୟାଟେରିର ନମ୍ବର ଏଫ୍‌ଆଇଆର୍‌ରେ ଉଲ୍ଲେଖ ହୋଇଥିବା କାଗଜପତ୍ର ସହ ମେଳ ଖାଇଥିବା ଚର୍ଚ୍ଚା ହେଉଛି। ଏଥିରୁ ଚୋରି ଘଟଣାର ସତ୍ୟତା ଆହୁରି ସ୍ପଷ୍ଟ ହୋଇଥିଲେ ମଧ୍ୟ ଅନ୍ୟ ବାକି ବ୍ୟାଟେରିଗୁଡ଼ିକ କେବେ ଉଦ୍ଧାର ହେବ ତାହା ନେଇ ପ୍ରଶ୍ନ ଉଠିଛି।

ସହରବାସୀଙ୍କ ମତ ଅନୁଯାୟୀ, ଜାତୀୟ ରାଜପଥ (NH) କଡ଼ରେ ଗଢ଼ିଉଠିଥିବା କିଛି କବାଡ଼ି ବ୍ୟବସାୟ କେନ୍ଦ୍ର ଦୀର୍ଘ ଦିନ ଧରି ପ୍ରଶାସନର ନଜରରୁ ବାହାରେ ରହିଛି। ଅନେକ ସ୍ଥାନରେ ଜବରଦଖଲ ଅଭିଯୋଗ ଥିବା ସତ୍ତ୍ୱେ କୌଣସି ଦୃଢ଼ ପଦକ୍ଷେପ ନିଆଯାଉ ନଥିବାରୁ ଅସାମାଜିକ ତତ୍ତ୍ୱମାନେ ସକ୍ରିୟ ହେଉଥିବା କୁହାଯାଉଛି। ଚୋରି ସାମଗ୍ରୀ କବାଡ଼ି ଆଡ଼ରେ କିଣାବିକ୍ରି ହେଉଥିବା ଅଭିଯୋଗ ମଧ୍ୟ ସମୟ ସମୟରେ ସାମ୍ନାକୁ ଆସୁଛି।

ସହରର ବୁଦ୍ଧିଜୀବୀ ଓ ବ୍ୟବସାୟୀ ମହଳରେ ପ୍ରଶ୍ନ ଉଠୁଛି ଯେ, ଯଦି ଅଭିଯୋଗକାରୀ ନିଜେ ଗୋଟିଏ ଚୋରି ବ୍ୟାଟେରିର ସନ୍ଧାନ ପାଇପାରୁଛନ୍ତି, ତେବେ ଆଧୁନିକ ତଦନ୍ତ ବ୍ୟବସ୍ଥା ଓ ପୋଲିସର ଗୁଇନ୍ଦା ନେଟୱର୍କ ଥିବା ସତ୍ତ୍ୱେ ବାକି ବ୍ୟାଟେରିଗୁଡ଼ିକ କାହିଁକି ଉଦ୍ଧାର ହୋଇପାରୁନାହିଁ? ଏହା କି ତଦନ୍ତରେ ଅବହେଳା, ନା ଅନ୍ୟ କୌଣସି କାରଣ ରହିଛି? ଏଭଳି ପ୍ରଶ୍ନ ଏବେ ଜନସାଧାରଣଙ୍କ ମଧ୍ୟରେ ଆଲୋଚନାର ବିଷୟ ହୋଇଛି।

ସାଧାରଣ ଲୋକ ଦାବି କରିଛନ୍ତି ଯେ, ଚୋରି ଘଟଣାର ନିରପେକ୍ଷ ତଦନ୍ତ କରାଯାଇ ଚୋରି ହୋଇଥିବା ସମସ୍ତ ବ୍ୟାଟେରି ଉଦ୍ଧାର ସହ ଏହା ପଛରେ ଥିବା ଚକ୍ରକୁ ଠାବ କରାଯାଉ। ସେହିପରି NH କଡ଼ରେ ଚାଲୁଥିବା କବାଡ଼ି ବ୍ୟବସାୟର ବୈଧତା ଓ କାରବାରର ମଧ୍ୟ ଯାଞ୍ଚ କରାଯିବାକୁ ଦାବି ହେଉଛି। ନଚେତ ଆଗାମୀ ଦିନରେ ଏଭଳି ଚୋରି ଘଟଣା ବଢ଼ିବା ସହ ପ୍ରଶାସନ ଉପରେ ଲୋକଙ୍କ ଭରସା କମିଯିବ ବୋଲି ମତ ପ୍ରକାଶ ପାଉଛି।