ବାଘ ଛାଲ ଜବତ, ଧରାପଡ଼ିଲେ ଦୁଇ ଅଭିଯୁକ୍ତ |

ଗଞ୍ଜାମ ଜିଲା ଜରଡ଼ା ଥାନା ପୋଲିସ ଶନିବାର ୨ଟି କଲରାପତିରିଆ ବାଘ ଛାଲ ଜବତ କରିଛି। ଏପରିକି ପୋଲିସ ବନ୍ଧୁକ ବ୍ୟାଗ, ଧାରୁଆ ଅସ୍ତ୍ର ସହ ୨ଜଣ ଅଭିଯୁକ୍ତଙ୍କ ଗିରଫ କରିଛି। ସେମାନେ ହେଲେ କେଶବ ଜମାଦାର(୩୪) ଏବଂ ବିର ଜମାଦାର(୪୫)।

ଜରଡା ପୋଲିସ ବାଘ ଛାଲ ଡିଲ୍‌ ହେଉଥିବା କୌଣସି ସୂତ୍ରରୁ ସୂଚନା ପାଇ ଉପର ବୁରାତାଲ ଅଞ୍ଚଳରେ ଚଢାଉ କରିଥିଲା। ସେତିକିବେଳେ ପୋଲିସକୁ ଦେଖି ୨ଜଣ ବ୍ୟକ୍ତି ଜଙ୍ଗଲଆଡକୁ ଦୌଡି ଫେରାର ହେବାକୁ ଉଦ୍ୟମ କରିଥିଲେ। ପୋଲିସ ଟିମ୍‌ ସେମାନଙ୍କୁ ଗୋଡ଼ାଇ ଧରିବାକୁ ଚେଷ୍ଟା କରିଥିବା ବେଳେ ଅଭିଯୁକ୍ତମାନେ ଖଣ୍ଡା ବାହାର କରି ପୋଲିସ କର୍ମଚାରୀଙ୍କୁ ଧମକ ଦେଇଥିଲେ। ହେଲେ ପୋଲିସ ଟିମ୍‌ କୌଶଲ କ୍ରମେ ଅଭିଯୁକ୍ତମାନଙ୍କୁ ଧରିବାରେ ସକ୍ଷମ ହୋଇଥିଲା। ପଚରାଉଚରା ପରେ ପୋଲିସ ସେମାନଙ୍କ ନିକଟରୁ ଚିତା ବାଘର ୨ଟି ଚମଡ଼ା, ବନ୍ଧୁକ ବ୍ୟାଗ ଜବତ କରିଥିଲା।

ଅଧିକ ଛାନଭିନ ବେଳେ ଅଭିଯୁକ୍ତ କେଶବଙ୍କ ନିକଟରୁ ଜୀବନ୍ତ ବୋମା, ଗୋଟିଏ ଖଣ୍ଡା ମିଳିଥିଲା। ସେହିପରି ଅଭିଯୁକ୍ତ ବିରଙ୍କ ନିକଟରୁ ଚିତାବାଘ ଛାଲ, ଖଣ୍ଡା ଓ ବିସ୍ଫୋରକ ଆଦି ସାମଗ୍ରୀ ମିଳିଥିଲା। ଏନେଇ ପୋଲିସ ଏକ ମାମଲା(ନଂ.୧୮୬/୨୬) ରୁଜୁ କରି ଦୁଇ ଅଭିଯୁକ୍ତ କେଶବ ଏବଂ ବିରଙ୍କୁ ଗିରଫ କରି କୋର୍ଟ ଚାଲାଣ କରିଛି।