ଚୌଦ୍ୱାର ପରେ ଓଡ଼ିଶାର ଆଉ ଏକ ଜେଲରୁ ବିଚାରାଧୀନ କଏଦୀ ଫେରାର…

ସୋର,୨୨।୧୦: ଓଡ଼ିଶାରେ ପୁଣି ଏକ ଜେଲ୍‌ରୁ କଏଦୀ ଫେରାର ହେବା ଘଟଣା ସାମ୍ନାକୁ ଆସିଛି। ବାଲେଶ୍ୱର ଜିଲା ସୋର ଉପ-ଜେଲ୍‌ରୁ ଜଣେ ବିଚାରାଧୀନ କଏଦୀ ଫେରାର୍ ହୋଇଯାଇଛନ୍ତି।

ରିପୋର୍ଟ ଅନୁଯାୟୀ, ଦୀପକ ରୟ ନାମକ ଏହି ବିଚାରାଧୀନ କଏଦୀ (ଚୋରି ମାମଲାରେ ଅଭିଯୁକ୍ତ) କମ୍ବଳ ସାହାଯ୍ୟରେ ଜେଲର ଦକ୍ଷିଣ ପାର୍ଶ୍ୱ ପାଚେରୀ ଡେଇଁ ଖସି ପଳାଇଛନ୍ତି। ତାଙ୍କ ଘର ଝାଡ଼ଖଣ୍ଡ ଅଞ୍ଚଳରେ ଏବଂ ସେ ଅକ୍ଟୋବର ୧୮ ତାରିଖରେ ମାର୍କୋଣାରୁ ଗିରଫ ହୋଇ ଜେଲ୍‌ର ୱାର୍ଡ ନମ୍ବର ୪ରେ ଥିଲେ।

ଏହି ଘଟଣା ପରେ କାରାଗାର ମହାନିର୍ଦ୍ଦେଶକ ସୁଶାନ୍ତ ନାଥ ଘଟଣାର ବିସ୍ତୃତ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ବର୍ତ୍ତମାନ ଏହି ଜେଲରେ ପ୍ରାୟ ୨୫୦ ଜଣ କଏଦୀ ଥିବା ବେଳେ ମାତ୍ର ତିନି ଜଣ ସୁରକ୍ଷା କର୍ମଚାରୀ ନିୟୋଜିତ ଅଛନ୍ତି।

ଉଲ୍ଲେଖଯୋଗ୍ୟ ଯେ, ଏହି ମାସ ଆରମ୍ଭରେ କଟକ ଚୌଦ୍ୱାର ଜେଲ୍‌ରୁ ଦୁଇ ଜଣ ବିଚାରାଧୀନ କଏଦୀ ଫେରାର୍ ହେବା ପରେ ଜେଲରଙ୍କୁ ବଲାଙ୍ଗିର କଣ୍ଟାବାଞ୍ଜି ଉପ-ଜେଲ୍‌କୁ ବଦଳି କରାଯାଇଥିଲା।