ସିକିମ ବନ୍ୟାରେ ସେନାର ଭାସିଯାଇଥିବା ଗୋଳାବାରୁଦ ବିସ୍ଫୋରଣ, ୫ ମୃତ

ସିକିମ୍‌ ବାଦଲ ଫଟା ବର୍ଷା ଯୋଗୁଁ ଆସିଥିବା ବନ୍ୟା ପରେ ତୀସ୍ତା ନଦୀ କୂଳରେ ବିସ୍ଫୋରଣ ହୋଇଛି । ନଦୀ କୂଳରେ ମୋର୍ଟାର ସେଲ ଉଠାଇବାକୁ ଚେଷ୍ଟା କରୁଥିବା ବେଳେ ଜଣେ ପିଲା ସହିତ ୫ ଜଣଙ୍କର ଜୀବନ ଚାଲିଯାଇଛି । ବିସ୍ଫୋରଣର ଭିଡିଓ ସାମ୍ନାକୁ ଆସିଛି । ପ୍ରଶାସନ ପକ୍ଷରୁ ଚେତାବନୀ ଜାରି କରାଯାଇଛି, ଆଉ ନଦୀ କୂଳରୁ ଦୂରେଇ ରହିବା ସହିତ କୌଣସି ଜିନିଷକୁ ହାତ ଲଗାଇବାକୁ ମନା କରାଯାଇଛି । ନଦୀ କୂଳରେ ଗୋଳା ବାରୁଦ ଯୋଗୁଁ ବିସ୍ଫୋରଣ ହୋଇଥିବା ପ୍ରଶାସନ ପକ୍ଷରୁ ଆଶଙ୍କା କରାଯାଉଛି । ଆଉ ଏଭଳି କିଛି ସନ୍ଦିଗ୍ଧ ଜିନିଷ ଦେଖିଲେ ସ୍ଥାନୀୟ ପୋଲିସକୁ ସୂଚନା ଦେବାକୁ କୁହାଯାଇଛି ।ସେନା ପକ୍ଷରୁ ସ୍ଥାନୀୟ ଲୋକଙ୍କୁ ସତର୍କ କରାଯାଇଛି ଏବଂ ଅନୁରୋଧ କରାଯାଇଛି କି, ଯଦି କୌଣସି ଗୋଳା ବାରୁଦ ଏବଂ ସନ୍ଦିଗ୍ଧ ଜିନିଷ ଦେଖନ୍ତି, ତେବେ ପୋଲିସ ଅଧିକାରୀଙ୍କୁ ତୁରନ୍ତ ସୂଚନା ଦିଅନ୍ତୁ । କୌଣସି ପ୍ରକାରର ବସ୍ତୁକୁ ଛୁଇଁବାକୁ ମନା କରାଯାଇଛି ।ମଙ୍ଗଳବାର ସିକିମରେ ବାଦଲ ଫଟା ବର୍ଷା ଯୋଗୁଁ ନଦୀ ବନ୍ଧ ଭାଙ୍ଗିଯାଇଥିଲା । ଫଳରେ ବନ୍ୟା ପାଣି ମାଡିଆସିବାରୁ ଏପର୍ଯ୍ୟନ୍ତ ୪୧ ଜଣ ମୃତ୍ୟୁବରଣ କରିଛନ୍ତି । ପାଖାପାଖି ୧୨୦୦ ଘର ଭାସିଯାଇଛି । ଭାସିଯାଇଥିବା ୨୩ ଜଣ ସେନା ଯବାନଙ୍କ ମଧ୍ୟରୁ ଏପର୍ଯ୍ୟନ୍ତ ୧୫ ଜଣଙ୍କ ପତ୍ତା ମିଳୁନି । ସେହିପରି ୧୦୩ ଜଣ ଲୋକ ନିଖୋଜ ରହିଛନ୍ତି । ଉଦ୍ଧାରକାରୀ ଦଳ ତୃତୀୟ ଦିନରେ କାଦୁଅ ଭିତରେ ଫସିଥିବା ଲୋକଙ୍କୁ ଉଦ୍ଧାର କରିବା ପାଇଁ ଚେଷ୍ଟା କରୁଛନ୍ତି । ୨୫ ହଜାରରୁ ଅଧିକ ଲୋକ ପ୍ରଭାବିତ ହୋଇଛନ୍ତି ।ସେନା ଯବାନଙ୍କୁ ଖୋଜା ଚାଲିଛି । ଯେଉଁ ସେନା ଯବାନଙ୍କ ମୃତଦେହ ମିଳିଛି, ସେମାନେ ନୋପାଳ, ବାଂଲାଦେଶ ଏବଂ ପଶ୍ଚିମବଙ୍ଗରୁ ଉଦ୍ଧାର କରାଯାଇଛି । ଏହି ଅପରସେନରେ ତିରଙ୍ଗା ମାଉଟେନ୍‌ ରେସକ୍ୟୁର ଅତିରିକ୍ତ ଟିମ, ସନ୍ଧାନୀ କୁକୁର, ବିଶେଷ ରାଡାର ସେବାକୁ ଲଗାଯାଇଛି ।ମୁଖ୍ୟମନ୍ତ୍ରୀ ପ୍ରେମ ସିଂ ତାମାଙ୍ଗ ମୃତକଙ୍କ ପରିବାରକୁ ୪ ଲକ୍ଷ ଟଙ୍କାର କ୍ଷତିପୂରଣ ଘୋଷଣା କରିଛନ୍ତି । ସେହିପରି ଶିବିରରେ ରହିଥିବା ଲୋକଙ୍କୁ ୨,୦୦୦ ଟଙ୍କା ତତ୍‌କାଳ ଦେବାକୁ ଘୋଷଣା କରାଯାଇଛି ।