ନିଶାରେ ଉବୁଟୁବୁ ଭାରତୀୟ କ୍ରିକେଟର, ବଡ ଖୁଲାସା କଲେ ଜାଡେଜାଙ୍କ ପତ୍ନୀ |

 ଭାରତୀୟ କ୍ରିକେଟ୍ ଦଳର ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କ ପତ୍ନୀ ରିଭାବା ଜାଡେଜା ଟିମ୍ ଇଣ୍ଡିଆର ଖେଳାଳିଙ୍କୁ ନେଇ ଏକ ବଡ଼ ଦାବି କରିଛନ୍ତି। ସେ କହିଛନ୍ତି ଯେ ବିଦେଶ ଗସ୍ତ ସମୟରେ ଖେଳାଳିମାନେ ବିଭିନ୍ନ ପ୍ରକାରର ନିଶା ବା ଭାଇସ୍‌ରେ ଲିପ୍ତ ରୁହନ୍ତି। ତେବେ ସେ ଦୃଢ଼ତାର ସହ କହିଛନ୍ତି ଯେ ତାଙ୍କ ସ୍ୱାମୀ ରବୀନ୍ଦ୍ର କେବେହେଲେ ଏପରି କୌଣସି ଅଭ୍ୟାସରେ ସାମିଲ୍ ହୁଅନ୍ତି ନାହିଁ।

ଏକ କାର୍ଯ୍ୟକ୍ରମରେ ଯୋଗଦେଇ ରିଭାବା କହିଛନ୍ତି, ‘ମୋ ସ୍ୱାମୀ, କ୍ରିକେଟର୍ ରବୀନ୍ଦ୍ର ଜାଡେଜାଙ୍କୁ କ୍ରିକେଟ୍ ଖେଳିବା ପାଇଁ ଲଣ୍ଡନ, ଦୁବାଇ ଏବଂ ଅଷ୍ଟ୍ରେଲିଆ ଭଳି ଅନେକ ଦେଶକୁ ଯାତ୍ରା କରିବାକୁ ପଡ଼ିଥାଏ। ତଥାପି, ଆଜି ପର୍ଯ୍ୟନ୍ତ ସେ କୌଣସି ପ୍ରକାରର ନିଶା ବା ଭାଇସ୍‌କୁ ଛୁଇଁ ନାହାଁନ୍ତି କିମ୍ବା ସେଥିରେ ସାମିଲ୍ ହୋଇ ନାହାଁନ୍ତି, କାରଣ ସେ ତାଙ୍କର ଦାୟିତ୍ୱକୁ ବୁଝିଛନ୍ତି।’ ସେ ଆହୁରି ମଧ୍ୟ କହିଛନ୍ତି, ‘ଦଳର ଅନ୍ୟ ସମସ୍ତ ସଦସ୍ୟ ନିଶାରେ ଲିପ୍ତ ଥାଆନ୍ତି, କିନ୍ତୁ ସେମାନଙ୍କ ଉପରେ କୌଣସି କଟକଣା ନାହିଁ।’

ଏଠାରେ ଉଲ୍ଲେଖଯୋଗ୍ୟ ଯେ, ୨୦୧୬ରେ କେ.ଏଲ୍ ରାହୁଲ ୱେଷ୍ଟଇଣ୍ଡିଜ୍ ଗସ୍ତ ସମୟରେ ସୋସିଆଲ ମିଡିଆରେ ମଦ ବୋତଲ ଧରିଥିବା ଏକ ଫଟୋ ପୋଷ୍ଟ କରିଥିଲେ। ଏହି ଫଟୋ ଭାଇରାଲ୍ ହେବା ପରେ BCCI ଖେଳାଳିମାନଙ୍କୁ ସୋସିଆଲ ମିଡିଆରେ ଅଧିକ ସତର୍କ ରହିବାକୁ ନିର୍ଦ୍ଦେଶ ଦେଇଥିଲା ଏବଂ ରାହୁଲଙ୍କୁ ତାହା ଡିଲିଟ୍ କରିବାକୁ ପଡିଥିଲା।

ଚଳିତ ବର୍ଷ ଆରମ୍ଭରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଖେଳାଳିମାନଙ୍କୁ ତମାଖୁ ଏବଂ ମଦ୍ୟପାନ ସାମଗ୍ରୀର ସରୋଗେଟ୍ ବିଜ୍ଞାପନରେ ଅଂଶଗ୍ରହଣ କରିବାରୁ ରୋକିବା ପାଇଁ BCCI ଏବଂ SAI (Sports Authority of India) ନିକଟକୁ ଯାଇଥିଲା। ଖେଳାଳିମାନଙ୍କୁ ଏପରି ବିଜ୍ଞାପନରୁ ଦୂରେଇ ରହିବାକୁ ସ୍ପଷ୍ଟ ନିର୍ଦ୍ଦେଶ ଦେବାକୁ ବୋର୍ଡକୁ ପରାମର୍ଶ ଦିଆଯାଇଥିଲା।