ହୁତୁହୁତୁ ହୋଇ ଜଳୁଛି ଶିମିଳିପାଳ। ଶିମିଳିପାଳର ଆଭ୍ୟନ୍ତରୀଣ ଅଞ୍ଚଳରେ ଲାଗିଛି ନିଆଁ। ୩ ରୁ ୪ ଘଣ୍ଟା ହେବ ଜଳି ଚାଲିଛି ନିଆଁ। ଶିମିଳିପାଳର ସାଉଥ ଡିଭିଜନ ପୋଡାଡିହା ରେଞ୍ଜର ମନଭଙ୍ଗା ବିଟ ଅଞ୍ଚଳରେ ନିଆଁ ଲାଗି ବ୍ୟାପକ ଭାବେ ଜଳୁଛି। ନିଆଁ ଅତି ତୀବ୍ର ଭାବରେ ଶିମିଳିପାଳ ଭିତରକୁ ବ୍ୟାପିବାରେ ଲାଗିଛି।ମନଭଙ୍ଗା ବିଟ ଅଞ୍ଚଳରେ ପ୍ରତିଦିନ ବନ୍ୟ ଜୀବଜନ୍ତୁ ଜଙ୍ଗଲରୁ ବାହାରକୁ ଆସୁଥିବାବେଳେ ସେହି ସ୍ଥାନରେ ହିଁ ନିଆଁ ଲାଗିଥିବାରୁ ଏବେ ସଙ୍କଟରେ ଶିମିଳିପାଳ ଓ ବନ୍ୟଜନ୍ତୁ। ଧୀରେ ଧୀରେ ନିଆଁ କାୟା ବିସ୍ତାର କରିବାରେ ଲାଗିଥିବା ବେଳେ ବଡ଼ ବଡ଼ ଗଛ ନିଆଁରେ ହୁତୁହୁତୁ ହୋଇ ଜଳୁଥିବା ଦେଖାଯାଇଛି। ନିଆଁ ଜଙ୍ଗଲ ଭିତରକୁ ଯିବା ସହିତ ଜଙ୍ଗଲ ନିକଟରେ ଥିବା ଜନବସତି ଆଡକୁ ମଧ୍ୟ ବ୍ୟାପୁଛି। ବନ ବିଭାଗ ନିଆଁକୁ ଆୟତ୍ତ କରିବାରେ ବିଫଳ ହୋଇଛି। ଏହି ନିଆଁ ଲାଗିବା ଫଳରେ ବହୁ ଔଷଧୀୟ ବୃକ୍ଷ ଏବଂ ଲତା ପୋଡି ନଷ୍ଟ ହୋଇଯାଉଛି। ସେପଟେ ନିଆଁ ଭୟଙ୍କର ରୂପ ଧାରଣ କରି ବଫର ଏରିଆରୁ କୋର ଏରିଆକୁ ବ୍ୟାପୁଥିବା କୁହାଯାଉଛି।

More Stories
ଜଙ୍ଗଲ ନିଆଁ ନିୟନ୍ତ୍ରଣ ପାଇଁ ଝାରସୁଗୁଡ଼ା ବନଖଣ୍ଡର ବ୍ୟାପକ ପ୍ରସ୍ତୁତି; ୬୪ ସ୍କ୍ୱାଡ୍ ଓ ୨୪ ଘଣ୍ଟିଆ କଣ୍ଟ୍ରୋଲ୍ ରୁମ୍ ଜାରି
ଆସନ୍ତା ୧୭ ତାରିଖରେ ଲଘୁଚାପ ସମ୍ଭାବନା
ମାନିଲା: ଫିଲିପାଇନ୍ସରେ ସାମୁଦ୍ରିକ ଝଡ଼ ‘କାଲମେଗି’ର ତାଣ୍ଡବ ଦେଖିବାକୁ ମିଳିଛି। ଏଥିରେ ୧୧୪ ଜଣଙ୍କର ପ୍ରାଣହାନି ଘଟିଥିବାବେଳେ ଶତାଧିକ ନିଖୋଜ ଅଛନ୍ତି। ବୁଧବାର ଦକ୍ଷିଣ ଚୀନ ସାଗରରେ ସୃଷ୍ଟି ଏହି ଝଡ଼ ଯୋଗୁଁ ସେବୁ ପ୍ରଦେଶ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଥିବା ଜଣାପଡିଛି। ସେବୁ ପ୍ରଦେଶରେ ୭୧ ଜଣ ପ୍ରାଣ ହରାଇଥିବା କୁହାଯାଇଛି। ଏହି ପ୍ରାକୃତିକ ବିପର୍ଯ୍ୟୟରେ ୨୦ ଲକ୍ଷ ଲୋକ ପ୍ରଭାବିତ ହୋଇଥିବାବେଳେ ୫.୬ ଲକ୍ଷ ଲୋକ ବାସଚ୍ୟୁତ ହୋଇଥିବା କୁହାଯାଇଛି। ୪ ଲକ୍ଷ ୫୦ ହଜାର ଲୋକଙ୍କୁ ଅସ୍ଥାୟୀ ରିଲିଫ ଶିବିରକୁ ସ୍ଥାନାନ୍ତର କରାଯାଇଛି। ଏହି ପରିପ୍ରେକ୍ଷୀରେ ରାଷ୍ଟ୍ରପତି ଫର୍ଡିନାଣ୍ଡ ମାର୍କୋସ ଜୁନିଅର ଦେଶରେ ଜରୁରୀ ପରିସ୍ଥିତି ଘୋଷଣା କରିଛନ୍ତି।ବାତ୍ୟା ପ୍ରଭାବିତ ଅଞ୍ଚଳରେ ସଡକଗୁଡିକ କ୍ଷତିଗ୍ରସ୍ତ ହୋଇଥିବାରୁ ରିଲିଫ୍ କାର୍ଯ୍ୟ ବାଧାପ୍ରାପ୍ତ ହୋଇଛି। ବୁଧବାର ବାତ୍ୟାଞ୍ଚଳକୁ ରିଲିଫ୍ ଯୋଗାଇବାକୁ ଯାଇଥିବାବେଳେ ଫିଲିପାଇନ୍ସ ବାୟୁସେନାର ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ଛଅଜଣଙ୍କର ପ୍ରାଣହାନି ଘଟିଛି। କାଲମେଗି ଯୋଗୁଁ ଫାଲିପାଇନ୍ସର କେତେକ ସ୍ଥାନରେ ଆକସ୍ମିକ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଏକାଧିକ ନଦୀର ଜଳପତ୍ତନ ବୃଦ୍ଧି ପାଇଥିବାରୁ କେତେକ ଗ୍ରାମରେ ଲୋକେ ଜଳବନ୍ଦୀ ଅବସ୍ଥାରେ ରହିଥିବା ଲକ୍ଷ୍ୟ କରାଯାଇଛି। ଫିଲିପାଇନ୍ସ ସରକାର ଝଡ଼ର ମୁକାବିଲା ପାଇଁ ପ୍ରସ୍ତୁୁତ ଥିବାବେଳେ ଆକସ୍ମିକ ବନ୍ୟା ସ୍ଥିତିକୁ ଅଧିକ ଜଟିଳ କରିଛି ବୋଲି ସେବୁ ପ୍ରଦେଶ ଗଭର୍ଣ୍ଣର ପାମେଲା ବାରିକ୍ୟୁଆତ୍ରୋ କହିଛନ୍ତି। ସୂଚନାଯୋଗ୍ୟ ଗତ ସେପ୍ଟେମ୍ବର ୩୦ରେ ସେବୁ ପ୍ରଦେଶରେ ୬.୯ ତୀବ୍ରତାର ଭୂମିକମ୍ପ ହୋଇଥିବାବେଳେ ୭୯ ଲୋକ ପ୍ରାଣ ହରାଇଥିଲେ। ଫିଲିପାଇନ୍ସ ପାଣିପାଗ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ ପ୍ରଶାନ୍ତ ମହାସାଗରରେ ଆଉ ଏକ ସାମୁଦ୍ରିକ ଝଡ଼ ଦାନା ବାନ୍ଧୁଥିବାବେଳେ ଆଗାମୀ ସପ୍ତାହରେ ଏହା ଉତ୍ତର ଫିଲିପାଇନ୍ସରେ ବ୍ୟାପକ କ୍ଷତି କରିବ।