ବଜ୍ରାଘାତରେ ଟଳି ପଡ଼ିଲେ ଗାଈ ଚରାଳି |

ଢେ଼ଙ୍କାନାଳ ଜିଲ୍ଲା ପରଜଙ୍ଗ ନିର୍ବାଚନ ମଣ୍ଡଳୀ ଅନ୍ତର୍ଗତ କଙ୍କଡ଼ାହାଡ଼ ବ୍ଲକରେ ସୋମବାର ଅପରାହ୍ନ ସମୟରେ ଘଟି ଯାଇଛି ଏକ ଅଭାବନୀୟ ଘଟଣା । ଆଷାଢ଼ ମାସ ଯାଇ ଶ୍ରାବଣ ମାସ ଆସିଛି । ତଥାପି ଥମୁନି ବର୍ଷା ଘଡ଼ଘଡ଼ି ଏହା ସାଙ୍ଗକୁ ବଜ୍ରପାତ । ପ୍ରକୃତିର ତାଣ୍ଡବ କରାଳ ପରିବେଶରେ ସବୁଦିନ ପାଇଁ ଲୁଚିଯାଇଥାଏ ମଣିଷର ଜୀବନ । ଏପରି ଏକ ଦୃଷ୍ଟାନ୍ତ ଦୃଶ୍ୟ ଦେଖିବାକୁ ମିଳିଛି କଙ୍କଡ଼ାହାଡ଼ ଥାନା ଅନ୍ତର୍ଗତ କନ୍ଧରା ଗ୍ରାମ ରଙ୍ଗ ମାଟିଆ ଗାଁରେ । ଏହି ଗାଁର ଅର୍ଜୁନ ବିଶ୍ୱାଳଙ୍କ ପୁଅ ଅଭିମନ୍ୟୁ ବିଶ୍ଵାଳ ସବୁଦିନ ପରି ସୋମବାର ସକାଳୁ ଗାଁ ପାଖ ଜଙ୍ଗଲକୁ ଗାଈ ଗୋରୁ ଚରାଇବାକୁ ନେଇଥିଲେ । ଅପରାହ୍ନ ସମୟରେ ହଠାତ୍ କଳାହାଣ୍ଡିଆ ମେଘ ଘୋଟି ଆସିଥିଲା । ବର୍ଷା ଦାଉରୁ ରକ୍ଷା ପାଇବା ପାଇଁ ଅଭିମନ୍ୟୁ ଗାଈ ଗୋରୁ ଧରି ଆସୁଥିଲେ । ଗାଈ ଗୋରୁ ପଲ୍ଲକୁ ଧରି ଆସିବା ବାଟରେ ଅଭିମନ୍ୟୁ ବଜ୍ରାଘାତର ଶିକାର ହୋଇଥିଲେ । ହଠାତ୍ ବର୍ଷା ଘଡଘଡ଼ି ସାଙ୍ଗକୁ ବଜ୍ରାଘାତ ଯୋଗୁଁ ଗାଈ ଗୋରୁ ଚରାଇବାକୁ ନେଇଥିବା ଅଭିମନ୍ୟୁ ମୃତ୍ୟୁ ବରଣ କରିଥିଲେ । ମୃତ୍ୟୁ ଖବର ପାଇ ପରିବାର ଲୋକେ ଘଟଣା ସ୍ଥଳରେ ପହଞ୍ଚି କାନ୍ଦ ବୋବାଳିରେ ଶୋକାକୁଳ ପରିବେଶ ସୃଷ୍ଟି ହୋଇଯାଇଥିଲା । ଏପରି ଅକସ୍ମାତ୍ ମୃତ୍ୟୁକୁ ନେଇ ଅଞ୍ଚଳରେ ଶୋକର ଛାୟା ନିମିଷକ ମଧ୍ୟରେ ଖେଳାଇ ଦେଇଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଛେଦ ପାଇଁ ମେଡ଼ିକାଲକୁ ପଠାଇ ଦେଇଥିଲେ ।( ଢ଼େଙ୍କାନାଳ ଜିଲ୍ଲା ପରଜଙ୍ଗ ବ୍ଲକରୁ ନିର୍ମଳ ଗଡ଼ ନାୟକଙ୍କ ରିପୋର୍ଟ )