ଏଣିକି ଟ୍ରେନ୍‌ରେ ଲଗେଜ୍‌ ଚୋରି ହେଲେ ଜରିମାନା ଦେବ ରେଳ ବିଭାଗ, ଜାଣନ୍ତୁ ସମ୍ପୂର୍ଣ୍ଣ ତଥ୍ୟ…

ଯଦି ଆପଣ ଟ୍ରେନରେ ଯାତ୍ରା କରୁଛନ୍ତି ଆଉ ଏହି ସମୟରେ ଆପଣଙ୍କ ବ୍ୟାଗ କିମ୍ବା ମୂଲ୍ୟବାନ ଜିନିଷ ଚୋରି ହୋଇଯାଉଛି, ତେବେ ଆଉ ଚିନ୍ତା ନାହିଁ। ଏଣିକି ଟ୍ରେନ୍‌ରେ ଲଗେଜ୍‌ ଚୋରି ହେଲେ ରେଳ ବିଭାଗ କ୍ଷତିପୂରଣ ଭରଣା କରିବ। ଜାଣନ୍ତୁ ପୂରା ତଥ୍ୟ…

ରାଜଧାନୀ ଏକ୍ସପ୍ରେସରେ ଯାତ୍ରା କରୁଥିବା ଏକ ପରିବାରର ଲଗେଜ୍‌ ଚୋରି ହୋଇଯାଇଥିଲା। ମାମଲା ଉପଭୋକ୍ତା କମିଶନକୁ ଯାଇଥିଲା, ଯେଉଁଠାରେ ରେଳ ବିଭାଗ ପକ୍ଷରୁ ଅବହେଳା ପ୍ରମାଣିତ ହେବା ପରେ, ପୀଡ଼ିତ ପରିବାର ସପକ୍ଷରେ ରାୟ ଦିଆଯାଇଥିଲା। କୋର୍ଟ ରେଳ ବିଭାଗକୁ ୮୦୦୦୦ ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଥିଲେ।

ଏହି ଘଟଣା ୧୪ ଡିସେମ୍ବର ୨୦୨୧ରେ ଘଟିଥିଲା। ଜଣେ ବ୍ୟକ୍ତି ତାଙ୍କ ସ୍ତ୍ରୀ ଏବଂ ପିଲାଙ୍କ ସହିତ ରାଜଧାନୀ ଏକ୍ସପ୍ରେସ୍‌ ଟ୍ରେନ ନମ୍ବର ୧୨୪୨୩ର ୩-AC କୋଚ୍‌ରେ ଯାତ୍ରା କରୁଥିଲେ। ଏହି ସମୟରେ ମହିଳାଙ୍କ ହ୍ୟାଣ୍ଡବ୍ୟାଗ୍‌ ଚୋରି ହୋଇଯାଇଥିଲା। ବ୍ୟାଗରେ ପ୍ରାୟ ୧.୫ ତୋଳା ଓଜନର ଏକ ସୁନା ମଙ୍ଗଳସୂତ୍ର, ନଗଦ ୫୦୦୦ ଟଙ୍କା ଏବଂ ଏସ୍‌ବିଆଇର ପାସ୍‌ବୁକ୍‌ ଥିଲା। ପଣ୍ଡିତ ଦୀନ ଦୟାଲ ଉପାଧ୍ୟାୟ ରେଳ ଷ୍ଟେଶନରେ ଟ୍ରେନ୍‌ ପହଞ୍ଚିବା ପରେ ଚୋରି ଘଟଣା ଜଣାପଡ଼ିଥିଲା।

ବ୍ୟାଗ୍‌ଟି ହଜିବା ପରେ, ପରିବାର ପ୍ରଥମେ କୋଚ୍‌ ଆଟେଣ୍ଡାଣ୍ଟଙ୍କୁ ଖୋଜିଥିଲେ, କିନ୍ତୁ ସେ ଡ୍ୟୁଟିରେ ନ ଥିଲେ। ପରେ ସେମାନେ ଟ୍ରେନ୍‌ର ଟିଟିଇ ଏବଂ ଆର୍‌ପିଏଫ୍‌ ଏସ୍କର୍ଟଙ୍କୁ ଘଟଣା ବିଷୟରେ ଜଣାଇଥିଲେ। ଟ୍ରେନ୍‌ ନୂଆଦିଲ୍ଲୀରେ ପହଞ୍ଚିବା ପରେ ଏକ ଏଫ୍‌ଆଇଆର୍‌ ଦାୟର କରାଯାଇଥିଲା। ରେଳବାଇ କହିଛି ଯେ, ଷ୍ଟେଶନ ମାଷ୍ଟର ଚୋରି ବିଷୟରେ କୌଣସି ସୂଚନା ପାଇ ନ ଥିଲେ, ତେଣୁ ରେଳ ବିଭାଗ ଦାୟୀ ନୁହେଁ।କୋର୍ଟ ଶୁଣାଣି ସମୟରେ, ପଠାନକୋଟ କନ୍‌ଜ୍ୟୁମର କୋର୍ଟ ରେଳ ବିଭାଗର ଯୁକ୍ତି ଗ୍ରହଣ କରିବାକୁ ମନା କରିଦେଇଥିଲେ। କୋର୍ଟ କହିଥିଲେ ଯେ, ଯେହେତୁ ରେଳବାଇ ନିଜେ ସ୍ବୀକାର କରିଛି ଆର୍‌ପିଏଫ୍‌ ଏସ୍କର୍ଟଙ୍କ ନିକଟରେ ଅଭିଯୋଗ କରାଯାଇଛି, ତେଣୁ ଏହା କୁହାଯାଇପାରିବ ନାହିଁ ଯେ ରେଳ ପ୍ରଶାସନ ଘଟଣା ବିଷୟରେ ଅଜ୍ଞ ଥିଲା। କୋର୍ଟ ଏହା ମଧ୍ୟ କହିଛନ୍ତି ଯେ, ରେଳବାଇ ପ୍ରମାଣ କରିପାରିଲା ନାହିଁ ଯେ ଘଟଣା ସମୟରେ କୋଚ ଆଟେଣ୍ଡାଣ୍ଟ ଡ୍ୟୁଟିରେ ଥିଲେ। ରେଳବାଇ ତାଙ୍କର ଡ୍ୟୁଟି ରୋଷ୍ଟର ପ୍ରଦାନ କରି ନ ଥିଲା।