ନୋବେଲ ଶାନ୍ତି ପୁରସ୍କାର ବିଜେତା କେତେ ଟଙ୍କା ପାଆନ୍ତି?

ନୂଆଦିଲ୍ଲୀ,୧୦ା୧୦: ଭେନେଜୁଏଲାର ବିରୋଧୀ ନେତ୍ରୀ ମାରିଆ କୋରିନା ମାଚାଡୋ ୨୦୨୫ ନୋବେଲ ଶାନ୍ତି ପୁରସ୍କାର ହାସଲ କରିଛନ୍ତି। ତାଙ୍କୁ ଏହି ପୁରସ୍କାର ଦେଶରେ ଗଣତନ୍ତ୍କୁ ପ୍ରୋତ୍ସାହନ ଓ ଏକଛତ୍ରବାଦ ବିରୋଧରେ ଲଢ଼େଇ ପାଇଁ ପ୍ରଦାନ କରାଯାଇଛି। ନୋବେଲ ଶାନ୍ତି ପୁରସ୍କାର ସହିତ ୧୧ ନିୟୁତ ସୁଇଡିଶ କ୍ରୋନର (SEK)(୧୦.୩ କୋଟି ଟଙ୍କା)ପୁରସ୍କାର ରାଶି ମିଳିଥାଏ। ଏହା ସହ ବିଜେତାଙ୍କୁ ଏକ ମେଡାଲ ଓ ଡିପ୍ଲୋମା ମଧ୍ୟ ପ୍ରଦାନ କରାଯାଏ।

ମେଡାଲଟି ୧୯୦୨ରୁ ବ୍ୟବହୃତ ହେଉଛି, ଯାହା ନରୱେର ଶିଳ୍ପୀ ଗୁଷ୍ଟାଭ ଭିଗେଲାଣ୍ଡ ଓ ସୁଇଡେନର ଖୋଦକାରୀ ଏରିକ ଲିଣ୍ଡବର୍ଗଙ୍କ ଦ୍ୱାରା ଡିଜାଇନ କରାଯାଇଛି। ଏହା ବର୍ତ୍ତମାନ ୧୮ କ୍ୟାରେଟ ସୁନାରେ ନିର୍ମିତ ଓ ୧୯୬ ଗ୍ରାମ ଓଜନ ବିଶିଷ୍ଟ। ମେଡାଲରେ ଆଲଫ୍ରେଡ ନୋବେଲଙ୍କ ଛବି ସହ ଲାଟିନ ଭାଷାରେ ଶାନ୍ତି ଓ ଭାଇଚାରା ପାଇଁ ଉକ୍ତି ଖୋଦିତ ହୋଇଛି।

ଆଲଫ୍ରେଡ ନୋବେଲଙ୍କ ଇଚ୍ଛାପତ୍ର ଅନୁଯାୟୀ ୧୯୦୧ରେ ପ୍ରତିଷ୍ଠିତ ଏହି ପୁରସ୍କାର ମାନବଜାତି ପାଇଁ ଉଲ୍ଲେଖନୀୟ ଅବଦାନ ପାଇଁ ପ୍ରଦାନ କରାଯାଏ। ୨୦୨୫ରେ ୩୩୮ଟି ମନୋନୟନ ମଧ୍ୟରୁ ମାଚାଡୋ ଏହି ସମ୍ମାନ ହାସଲ କରିଛନ୍ତି।