ଶେରି ସିଂ ହେଲେ ମିସେସ୍‌ ୟୁନିଭର୍ସ: ପ୍ରଥମ ଭାରତୀୟ …

ମାନିଲା, ୧୩ା୧୦:୪୮ତମ ମିସେସ୍‌ ୟୁନିଭର୍ସ ପ୍ରତିଯୋଗିତାରେ ଭାରତ ଇତିହାସ ରଚିଛି। ଉତ୍ତରପ୍ରଦେଶର ଗ୍ରେଟର ନଏଡା ନିବାସୀ ଶେରି ସିଂ ଚଳିତ ବର୍ଷର ପ୍ରତିଷ୍ଠିତ ମିସେସ୍‌ ୟୁନିଭର୍ସ ଟାଇଟଲ ହାସଲ କରିଛନ୍ତି। ସେ ପ୍ରଥମ ଭାରତୀୟ ଭାବେ ଏହି ଟାଇଟଲ ଜିତି ଦେଶକୁ ଗୌରବାନ୍ବିତ କରିଛନ୍ତି। ଫିଲିପାଇନ୍ସର ରାଜଧାନୀ ମାନିଲାଠାରେ ‘ମିସେସ୍‌ ୟୁନିଭର୍ସ ୨୦୨୫’ର ଆୟୋଜନ ହୋଇଥିଲା, ଯେଉଁଥିରେ ବିଶ୍ୱବ୍ୟାପୀ ୧୨୧ ଦେଶର ପ୍ରଭାବଶାଳୀ ମହିଳା ଭାଗ ନେଇଥିଲେ। ଶେରୀ ନିଜର ବୁଦ୍ଧିମତ୍ତା, ଶାଳୀନତା ଏବଂ ଆତ୍ମବିଶ୍ୱାସ ଆଧାରରେ ୧୨୦ ପ୍ରତିଯୋଗୀଙ୍କୁ ପଛରେ ପକାଇ ଐତିହାସିକ ମିସେସ୍‌ ୟୁନିଭର୍ସ ମୁକୁଟ ପିନ୍ଧିଥିଲେ। ଏହା କେବଳ ତାଙ୍କର ବ୍ୟକ୍ତିଗତ ସଫଳତା ନୁହେଁ, ବରଂ ଏହା ସୀମା ବାହାରକୁ ଯାଇ ନିଜ ସ୍ବପ୍ନ ସାକାର କରିବାକୁ ସାହସ ରଖିଥିବା ପ୍ରତ୍ୟେକ ଭାରତୀୟ ବିବାହିତା ମହିଳାଙ୍କ ପାଇଁ ପ୍ରେରଣା ବୋଲି ବିଜୟୀ ହେବା ପରେ ଶେରି କହିଛନ୍ତି। ଶେରିଙ୍କର ରାଜନୈତିକ ପୃଷ୍ଟଭୂମି ରହିଛି। ଗ୍ରେଟର ନଏଡାସ୍ଥିତ ମକୋଡା ଗ୍ରାମର ଏକ ପ୍ରତିଷ୍ଠିତ ଗୁଜ୍ଜର ପରିବାରରୁ ସେ ଆସନ୍ତି। ତାଙ୍କର ବାପା ଏବଂ ଜେଜେବାପା ଉଭୟ ପୂର୍ବରୁ ଉତ୍ତରପ୍ରଦେଶର ଦାଦରୀ ବିଧାନସଭା ଆସନରୁ ବିଧାୟକ ଭାବେ ନିର୍ବାଚିତ ହୋଇଛନ୍ତି।