ବନ୍ଧୁତା ବଳାତ୍କାର ପାଇଁ ଲାଇସେନ୍ସ ନୁହେଁ ଦିଲ୍ଲୀ ହାଇକୋର୍ଟ…

ନୂଆଦିଲ୍ଲୀ,୨୩ା୧୦: ଜଣେ ୧୭ ବର୍ଷୀୟ ନାବାଳିକାକୁ ବାରମ୍ବାର ବଳାତ୍କାର କରିଥିବା ଅଭିଯୋଗରେ ଜଣେ ଯୁବକର ଆଗୁଆ ଜାମିନ ଆବେଦନକୁ ଦିଲ୍ଲୀ ହାଇକୋର୍ଟ ଖାରଜ କରିଛନ୍ତି। କୋର୍ଟ କହିଛନ୍ତି ଯେ କାହା ସହିତ ବନ୍ଧୁତା ରଖିବା ବଳାତ୍କାର, ଅଟକ ରଖିବା କିମ୍ବା ଶାରୀରିକ ହିଂସା ପାଇଁ କୌଣସି ଲାଇସେନ୍ସ ନୁହେଁ। ଜଷ୍ଟିସ୍ ସ୍ୱରଣ କାନ୍ତ ଶର୍ମା ଅକ୍ଟୋବର ୧୭ ତାରିଖରେ ଶୁଣାଣି କରି ଏହି ପୋକ୍ସୋ (POCSO) ମାମଲାରେ ଯୁବକର ଆବେଦନକୁ ଖାରଜ କରି ଦେଇଛନ୍ତି।
ଅଭିଯୁକ୍ତ ଯୁବକ ଯୁକ୍ତି ବାଢ଼ିଥିଲା ଯେ ପୀଡ଼ିତାଙ୍କ ସହ ତାଙ୍କର ବନ୍ଧୁତା ଥିଲା ଏବଂ ସମ୍ପର୍କ ସହମତିରେ ଥିଲା। ଏହାକୁ ଖାରଜ କରି କୋର୍ଟ କହିଛନ୍ତି, “ଯଦିଓ ଉଭୟଙ୍କ ମଧ୍ୟରେ ବନ୍ଧୁତା ଥିଲା, ତଥାପି ଏହି ବନ୍ଧୁତା ଅଭିଯୁକ୍ତକୁ ପୀଡ଼ିତା ସହ ବାରମ୍ବାର ବଳାତ୍କାର କରିବା, ତାକୁ ବନ୍ଧୁ ଘରେ ଅଟକ ରଖିବା ଏବଂ ନିର୍ଦ୍ଦୟ ଭାବେ ପିଟିବା ପାଇଁ କୌଣସି ଅଧିକାର ଦିଏ ନାହିଁ।”
ଏଫ୍.ଆଇ.ଆର୍. ଦାଖଲରେ ୧୧ ଦିନ ବିଳମ୍ବ ହେବା ଯୁକ୍ତିକୁ ମଧ୍ୟ କୋର୍ଟ ଅଗ୍ରାହ୍ୟ କରିଥିଲେ। ପୀଡ଼ିତାଙ୍କ ଭୟ ଓ ଆଘାତକୁ ଦୃଷ୍ଟିରେ ରଖି ଏହି ବିଳମ୍ବ ସ୍ୱାଭାବିକ ବୋଲି କୋର୍ଟ ମତ ଦେଇଥିଲେ। ଅଭିଯୋଗର ଗମ୍ଭୀରତା ଏବଂ ମେଡିକାଲ୍ ପ୍ରମାଣ ଥିବାରୁ ଅଦାଲତ ଯୁବକର ଆଗୁଆ ଜାମିନ ଆବେଦନକୁ ଖାରଜ କରି ଦେଇଛନ୍ତି।