୮୩ ପିଲାଙ୍କୁ ଜନ୍ମଦେବ ବିଶ୍ୱର ପ୍ରଥମ AI ମନ୍ତ୍ରୀ…

ଟିରାନେ,୨୭।୧୦: ଆଲବାନିଆର ପ୍ରଧାନମନ୍ତ୍ରୀ ଏଡି ରାମା ଏକ ଆଶ୍ଚର୍ଯ୍ୟଜନକ ଘୋଷଣା କରିଛନ୍ତି। ଦେଶର ପ୍ରଥମ ଏଆଇ ମନ୍ତ୍ରୀ ଡିଏଲା ଗର୍ଭବତୀ ଅଛି। ମନ୍ତ୍ରୀ କେବଳ ଗୋଟିଏ କିମ୍ବା ଦୁଇଟି ନୁହେଁ, ବରଂ ୮୩ଟି ଏଆଇ ପିଲାଙ୍କୁ ଜନ୍ମ ଦେବେ। ପ୍ରଧାନମନ୍ତ୍ରୀଙ୍କ ଘୋଷଣା ସ୍ପଷ୍ଟ ଭାବରେ ଦର୍ଶାଉଛି ଯେ, ଆଲବାନିଆ କିପରି ଧୀରେ ଧୀରେ ଏଆଇକୁ ଗ୍ରହଣ କରୁଛି ଏବଂ ସରକାରରେ ସାମିଲ କରୁଛି। ଏହି ୮୩ଟି ଏଆଇ ପିଲା ପ୍ରତ୍ୟେକ ସମାଜବାଦୀ ପାର୍ଟି ସାଂସଦଙ୍କ ପ୍ରତିନିଧିତ୍ୱ କରିବେ।
ଜର୍ମାନୀର ବର୍ଲିନରେ ଗ୍ଲୋବାଲ ଡାଏଲଗ (BGD) ସମ୍ମିଳନୀରେ ସମ୍ବୋଧିତ କରି ରାମା କହିଛନ୍ତି, ଆଜି ଆମେ ଡିଏଲା ସହିତ ଏକ କଠୋର ପଦକ୍ଷେପ ନେଇଥିଲୁ ଏବଂ ଏଥିରେ ଆମେ ସଫଳ ହୋଇଥିଲୁ। ତେଣୁ ପ୍ରଥମ ଥର ପାଇଁ ଡିଏଲା ଗର୍ଭବତୀ ଏବଂ ୮୩ଟି ପିଲା ଜନ୍ମ କରିବେ।
ଏବେ ପ୍ରଶ୍ନ ଉଠୁଛି ଜଣେ ଏଆଇ ମନ୍ତ୍ରୀ କିପରି ଗର୍ଭବତୀ ହେଲେ? ଏହା ଅନେକଙ୍କୁ ଅଜବ ଲାଗୁଛି। ପ୍ରକୃତରେ ଡିଏଲା ଜଣେ ପ୍ରକୃତ ମଣିଷ ନୂହେଁ; ସେ ଜଣେ ଏଆଇ। ପ୍ରଧାନମନ୍ତ୍ରୀ ରାମା କୁହନ୍ତି ଯେ, ଡିଏଲା ଗର୍ଭବତୀ ଏବଂ ୮୩ଟି ପିଲାଙ୍କୁ ଜନ୍ମ ଦେବାକୁ ଯାଉଛନ୍ତି, ଏହା ପ୍ରକୃତ ଗର୍ଭଧାରଣକୁ ବୁଝାଉନାହିଁ ବରଂ ଏହା ସୂଚାଇବା ପାଇଁ ଏକ ପ୍ରତୀକାତ୍ମକ ଏବଂ ମେଟାଫୋରିକଲ ଉପାୟ। ଡିଏଲାର ୮୩ଟି ଏଆଇ ସହାୟକ ସଂସଦରେ କାମ କରିବେ।
ଏହାର ଅର୍ଥ ହେଉଛି ଏହି ପିଲାମାନେ ପ୍ରକୃତ ମଣିଷ ନୁହଁନ୍ତି ବରଂ ଏକ AI କାର୍ଯ୍ୟକ୍ରମ/ସିଷ୍ଟମର ସହାୟକ ଏଜେଣ୍ଟ ହେବେ, ଯାହା ସାଂସଦମାନଙ୍କୁ ସହାୟତା କରିବ ଏବଂ ତଥ୍ୟ ଟ୍ରାକ କରିବ। PM Rama ଉଦ୍ଦେଶ୍ୟମୂଳକ ଭାବରେ ଏହି ପ୍ରତୀକାତ୍ମକ ବକ୍ତବ୍ୟ ଦେଇଥିଲେ। ପ୍ରକୃତରେ କୌଣସି ଶାରୀରିକ ଗର୍ଭଧାରଣ ହୋଇନାହିଁ। ଏହା କେବଳ AI ବ୍ୟବସ୍ଥାକୁ ସରକାରରେ ବିସ୍ତାର କରିବାର ଏକ ସୃଜନଶୀଳ ଉପାୟ।