ହରିୟାଣାରେ କ୍ରସ୍‌ ଭୋଟିଂ: ୫ କଂଗ୍ରେସ ବିଧାୟକ ନିଲମ୍ବିତ |

ନୂଆଦିଲ୍ଲୀ: ହରିୟାଣାରେ ରାଜ୍ୟସଭା ନିର୍ବାଚନ ସମୟରେ କ୍ରସ୍‌ ଭୋଟିଂ କରିଥିବା ୫ ଜଣ କଂଗ୍ରେସ ବିଧାୟକଙ୍କୁ ଦଳରୁ ନିଲମ୍ବନ କରାଯାଇଛି। ଦଳୀୟ ଶୃଙ୍ଖଳା ଉଲ୍ଲଂଘନକୁ ଗମ୍ଭୀର ଭାବେ ନେଇ କଂଗ୍ରେସ ହାଇକମାଣ୍ଡ ଏହି କଡ଼ା ପଦକ୍ଷେପ ନେଇଛି।

ହରିୟାଣା କଂଗ୍ରେସ ସଭାପତି ରାଓ ନରେନ୍ଦ୍ର ସିଂ ଜାରି କରିଥିବା ନିଲମ୍ବନ ଆଦେଶ ଅନୁଯାୟୀ, ବିଧାୟକ ରେଣୁ ବାଲା, ଜର୍ଣ୍ଣୈଲ ସିଂହ, ମହମ୍ମଦ ଇସ୍ରାଏଲ, ମହମ୍ମଦ ଇଲିଆସ ଓ ସେଲି ଚୌଧୁରୀଙ୍କୁ ତୁରନ୍ତ ପ୍ରଭାବରୁ ଦଳର ପ୍ରାଥମିକ ସଦସ୍ୟତାରୁ ବର୍ଜିତ କରାଯାଇଛି।ମାର୍ଚ୍ଚ ୧୬ରେ ହରିୟାଣାରେ ଦୁଇଟି ରାଜ୍ୟସଭା ଆସନ ପାଇଁ ହୋଇଥିବା ନିର୍ବାଚନରେ, କଂଗ୍ରେସ ପ୍ରାର୍ଥୀଙ୍କ ବିପରୀତ ଭାବେ ଏହି ବିଧାୟକମାନେ ଭାଜପା ସମର୍ଥିତ ପ୍ରାର୍ଥୀଙ୍କ ପକ୍ଷରେ ଭୋଟ୍‌ ଦେଇଥିଲେ। ଏହାକୁ ଦଳ ବିରୋଧୀ କାର୍ଯ୍ୟକଳାପ ଭାବେ ଦେଖାଯାଇଛି।

ଦଳ ପକ୍ଷରୁ କୁହାଯାଇଛି ଯେ, ରାଜ୍ୟ ଶୃଙ୍ଖଳା କମିଟିର ସୁପାରିଶ ଓ ମଲ୍ଲିକାର୍ଜୁନ ଖାର୍ଗେଙ୍କ ଅନୁମୋଦନ ପରେ ଏହି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

ରାଓ ନରେନ୍ଦ୍ର ସିଂହ ସ୍ପଷ୍ଟ କରିଛନ୍ତି ଯେ ଦଳୀୟ ଶୃଙ୍ଖଳା ସର୍ବୋପରି ଓ ଏପରି ଅନୁଶାସନହୀନ କାର୍ଯ୍ୟକୁ କେବେ ବରଦାସ୍ତ କରାଯିବ ନାହିଁ। ଏହି ନିଷ୍ପତ୍ତି ଦଳର ସମସ୍ତ ନେତା ଓ କର୍ମୀଙ୍କ ପାଇଁ ଏକ ସ୍ପଷ୍ଟ ସନ୍ଦେଶ ଭାବେ ଦେଖାଯାଉଛି।