ପଶ୍ଚିମବଙ୍ଗର ଦୁର୍ଗାପୁରର ଶୋଭାପୁର ସ୍ଥିତ ଏକ ଘରୋଇ ମେଡିକାଲ କଲେଜର ଓଡ଼ିଆ ଡାକ୍ତରୀ ଛାତ୍ରୀଙ୍କୁ ଗଣଦୁଷ୍କର୍ମ ଘଟଣାରେ ରବିବାର ମୁହଁ ଖୋଲିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ। ତେବେ ତାଙ୍କ ମନ୍ତବ୍ୟକୁ ନେଇ ବିବାଦ ସୃଷ୍ଟି ହୋଇଛି। ତାଙ୍କ ମନ୍ତବ୍ୟ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। କାରଣ ଏଭଳି ଏକ ଘଟଣାକୁ ନେଇ ସେ ଅସମ୍ବେଦନଶୀଳ ମନ୍ତବ୍ୟ ଦେଇଛନ୍ତି।ପୀଡ଼ିତା ଏକ ଘରୋଇ ମେଡିକାଲ କଲେଜର ଛାତ୍ରୀ ହୋଇଥିବାରୁ ଏହି ଘଟଣା ପାଇଁ ପୂରା ଦାୟିତ୍ୱ ସରକାରଙ୍କଠାରୁ ହଟାଇ ଉକ୍ତ ମେଡିକାଲ କଲେଜ ଉପରେ ଲଦିବାକୁ ପ୍ରୟାସ କରିଛନ୍ତି ମମତା।ସେ କହିଛନ୍ତି, ସେ (ପୀଡ଼ିତା) ଏକ ଘରୋଇ ମେଡିକାଲ କଲେଜରେ ପଢ଼ନ୍ତି। ତା’ହେଲେ ଏହା କାହାର ଦାୟିତ୍ୱ? ସେ କାହିଁକି ରାତି ସାଢ଼େ ୧୨ଟା ବେଳେ ବାହାରକୁ ଆସିଥିଲେ? ଘରୋଇ ମେଡିକାଲ କଲେଜଗୁଡ଼ିକ ନିଜେ ସେମାନଙ୍କ ଶିକ୍ଷାର୍ଥୀଙ୍କ ଯତ୍ନ ନେବା ଉଚିତ। ତା’ସହିତ ରାତିରେ ବାହାରେ ବୁଲିବା ପ୍ରସଙ୍ଗ ଉପରେ ମଧ୍ୟ ଦୃଷ୍ଟି ଦେବା ଉଚିତ। ସେମାନଙ୍କୁ ରାତିରେ ବାହାରେ ବୁଲାବୁଲି କରିବାକୁ ଅନୁମତି ଦିଆନଯିବା ଉଚିତ। ସେମାନେ ନିଜକୁ ନିଜେ ରକ୍ଷା କରିବା ଉଚିତ। ମୁଁ ଯାହା ଜାଣିଛି ଘଟଣା ଘଟିଥିବା ସ୍ଥାନଟି ଏକ ଜଙ୍ଗଲ ଅଞ୍ଚଳରେ ଅଛି।ଏହା ସହିତ ସେ ଓଡ଼ିଶାର ବିଜେପି ନେତୃତ୍ୱାଧୀନ ସରକାରଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, ତିନି ସପ୍ତାହ ତଳେ ଓଡ଼ିଶାରେ ସମୁଦ୍ର କୂଳରେ ୩ ଜଣ ମହିଳାଙ୍କୁ ଦୁଷ୍କର୍ମ କରାଯାଇଥିଲା। ସେହି ମାମଲାରେ ଓଡ଼ିଶା ସରକାର କ’ଣ କାର୍ଯ୍ୟାନୁଷ୍ଠାନ ନେଇଛନ୍ତି। କିନ୍ତୁ ପଶ୍ଚିମବଙ୍ଗରେ ଯଦି ମହିଳାଙ୍କ ସହିତ କିଛି ବି ଘଟେ, ଆମେ ତାକୁ ସାଧାରଣ ମାମଲା ଭାବେ ନେଉ ନାହିଁ। ସେଗୁଡ଼ିକୁ ଆମେ ଗୁରୁତ୍ୱପୂର୍ଣ୍ଣ ମାମଲା ଭାବେ ଗ୍ରହଣ କରୁ।ତାଙ୍କର ଏହି ମନ୍ତବ୍ୟ ଅତ୍ୟନ୍ତ ଆଶ୍ଚର୍ଯ୍ୟ ଜନକ। କାରଣ ତିନି ସପ୍ତାହ ତଳେ ଓଡ଼ିଶାର କୌଣସି ସମୁଦ୍ର କୂଳରେ ଏମିତି ଏକ ଘଟଣା ଘଟି ନାହିଁ। ତଥାପି ମମତା ଜଣେ ମୁଖ୍ୟମନ୍ତ୍ରୀ ହୋଇ କେଉଁ ଆଧାରରେ ଏଭଳି ଏକ ତଥ୍ୟ ରଖିଲେ, ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।ମମତା ଆହୁରି କହିଛନ୍ତି, ଯେତେବେଳେ ଅନ୍ୟ ରାଜ୍ୟଗୁଡ଼ିକରେ ଏଭଳି ଘଟଣା ଘଟେ, ତାହା ନିନ୍ଦନୀୟ। ମଣିପୁର, ଉତ୍ତର ପ୍ରଦେଶ, ବିହାର ଓ ଓଡ଼ିଶାରେ ଏଭଳି ମାମଲା ବହୁତ ଘଟୁଛି। ଆମେ ଭାବୁଛୁ ସେଠାକାର ସରକାରଗୁଡ଼ିକ କଡ଼ା କାର୍ଯ୍ୟାନୁଷ୍ଠାନ ନେବା ଉଚିତ।

Spread the love

Post Views: 12