ମାଟ୍ରିକ ପରୀକ୍ଷା ଦେଇ ଫେରିବା ପରେ ଛାତ୍ରୀଙ୍କ ଆତ୍ମହତ୍ୟା: ପରୀକ୍ଷା କେନ୍ଦ୍ରରେ ମାନସିକ ନିର୍ଯ୍ୟାତନା ଅଭିଯୋଗ |

ଗଞ୍ଜାମ ଜିଲ୍ଲା ବ୍ରହ୍ମପୁର ସହରରେ ଏକ ଅଭାବନୀୟ ଘଟଣା ଘଟିଛି। ଚଳିତ ମାଟ୍ରିକ ପରୀକ୍ଷା ଦେଉଥିବା ଜଣେ ଦଶମ ଶ୍ରେଣୀ ଛାତ୍ରୀ ଶନିବାର ଇଂରାଜୀ ପରୀକ୍ଷା ଦେଇ ଘରକୁ ଫେରିବା ପରେ ଆତ୍ମହତ୍ୟା କରିଥିବା ଖବର ମିଳିଛି। ମୃତ ଛାତ୍ରୀ ଜଣକ ବ୍ରହ୍ମପୁର ଶ୍ରୀରାମ ନଗର ଅଞ୍ଚଳର ବୋଲି ଜଣାପଡ଼ିଛି।
​ସୂଚନା ଅନୁଯାୟୀ, ଗତ ଶନିବାର (୨୧ ଫେବୃଆରୀ) ଦିନ ଇଂରାଜୀ ପରୀକ୍ଷା ଚାଲିଥିବା ବେଳେ ବ୍ରହ୍ମପୁରର ଭି.ଭି. ଗିରି ସରକାରୀ ବାଳିକା ଉଚ୍ଚ ବିଦ୍ୟାଳୟ ପରୀକ୍ଷା କେନ୍ଦ୍ରରେ ଏହି ଛାତ୍ରୀଙ୍କ ପାଖରୁ ଏକ କପି (cheat sheet) ଜବତ ହୋଇଥିଲା। ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଏହି ଘଟଣା ପରେ ପରୀକ୍ଷା କେନ୍ଦ୍ରର ଶିକ୍ଷକ ଓ କର୍ମଚାରୀମାନେ ଛାତ୍ରୀଙ୍କୁ କଡ଼ା ଭାଷାରେ ଗାଳିଗୁଲଜ କରିବା ସହ ‘ମାଲ୍‌ପ୍ରାକ୍ଟିସ୍’ (Malpractice) କେସ୍ କରି ତିନି ବର୍ଷ ପାଇଁ ପରୀକ୍ଷାରୁ ବଞ୍ଚିତ କରିଦେବାକୁ ଧମକ ଦେଇଥିଲେ।
​ପରୀକ୍ଷା ଦେଇ ଘରକୁ ଫେରିବା ପରେ ଛାତ୍ରୀ ଜଣକ ଅତ୍ୟନ୍ତ ମାନସିକ ଚାପ ଓ ଭୟରେ ଥିଲେ। ସେ ସେହିଦିନ ସନ୍ଧ୍ୟା ସମୟରେ ଘର ଭିତରେ ଚରମ ପଦକ୍ଷେପ ନେଇଥିଲେ। ପରିବାର ଲୋକଙ୍କ କହିବା କଥା ଯେ, ଶିକ୍ଷକଙ୍କ ଦ୍ୱାରା ଦିଆଯାଇଥିବା ମାନସିକ ନିର୍ଯ୍ୟାତନା ଏବଂ ସାମାଜିକ ସମ୍ମାନ ହାନି ହେବା ଭୟରେ ସେ ଜୀବନ ହାରିଛନ୍ତି।
ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ଏହି ଅଭିଯୋଗକୁ ଖଣ୍ଡନ କରିଛନ୍ତି। ତାଙ୍କ କହିବା ଅନୁଯାୟୀ, ପରୀକ୍ଷା ଶାନ୍ତିଶୃଙ୍ଖଳାର ସହ ଶେଷ ହୋଇଥିଲା। ତଥାପି, ପରିବାରର ଅଭିଯୋଗକୁ ଆଧାର କରି ସିସିଟିଭି ଫୁଟେଜ୍ ଯାଞ୍ଚ କରାଯିବ ଏବଂ ଯଦି କୌଣସି କର୍ମଚାରୀ ଦୋଷୀ ସାବ୍ୟସ୍ତ ହୁଅନ୍ତି, ତେବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।ବ୍ରହ୍ମପୁର ବଡ଼ବଜାର ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜାରି ରଖିଛି। ପରୀକ୍ଷା ସମୟରେ ଛାତ୍ରଛାତ୍ରୀଙ୍କ ମାନସିକ ସ୍ଥିତି ପ୍ରତି ସତର୍କ ରହିବା ସହ ସେମାନଙ୍କୁ ସଠିକ୍ ପରାମର୍ଶ ଦେବା ପାଇଁ ଶିକ୍ଷାବିତ୍ ଓ ମନସ୍ତତ୍ତ୍ୱବିତ୍‌ମାନେ ପରାମର୍ଶ ଦେଇଛନ୍ତି।