ପ୍ରଶାସନ ନିଦ୍ରାରେ, ଗ୍ରାମବାସୀ ଜାଗ୍ରତ

: ନିଜେ ଶ୍ରମଦାନ କରି ଗାଁ ରାସ୍ତା ତିଆରି କଲେ ବୁଗୁଡ଼ାର ରାମଣ୍ଡା ବାସିନ୍ଦା
ସରକାର ଆସୁଛନ୍ତି, ସରକାର ଯାଉଛନ୍ତି; ହେଲେ ବଦଳୁନି ଗଞ୍ଜାମ ଜିଲ୍ଲା ବୁଗୁଡ଼ା ବ୍ଲକ ରାମଣ୍ଡା ଗ୍ରାମର ଭାଗ୍ୟ। ବର୍ଷ ବର୍ଷ ଧରି ପ୍ରଶାସନ ପାଖରେ ଗୁହାରି କରି ନିରାଶ ହେବା ପରେ ଶେଷରେ ‘ଆତ୍ମନିର୍ଭର’ ହୋଇଛନ୍ତି ଗ୍ରାମବାସୀ। କୌଣସି ସରକାରୀ ସହାୟତାକୁ ଅପେକ୍ଷା ନକରି ଗ୍ରାମବାସୀମାନେ ମିଳିତ ଭାବେ ନିଜ ଶ୍ରମ ଓ ସମ୍ବଳ ବିନିଯୋଗ କରି ଗ୍ରାମର ମୁଖ୍ୟ ରାସ୍ତା ନିର୍ମାଣ କରି ଏକ ନିଆରା ଉଦାହରଣ ସୃଷ୍ଟି କରିଛନ୍ତି।
​ସୂଚନା ଅନୁଯାୟୀ, ରାମଣ୍ଡା ଗ୍ରାମର ଏହି ରାସ୍ତାଟି ଦୀର୍ଘ ଦିନ ଧରି ଅତ୍ୟନ୍ତ ଶୋଚନୀୟ ଅବସ୍ଥାରେ ପଡ଼ି ରହିଥିଲା। ସାମାନ୍ୟ ବର୍ଷା ହେଲେ ରାସ୍ତାଟି କାଦୁଅରେ ଭରି ଯାଉଥିବାରୁ ଯାତାୟାତ ପାଇଁ ଅକଥନୀୟ କଷ୍ଟ ଭୋଗୁଥିଲେ ଲୋକେ। ବିଶେଷ କରି ସ୍କୁଲ ପିଲା, ରୋଗୀ ଓ ବୃଦ୍ଧବୃଦ୍ଧାମାନେ ଏହି କାଦୁଅ ରାସ୍ତାରେ ଯିବା ଆସିବା କରିବା ସମୟରେ ଅନେକ ସମୟରେ ଦୁର୍ଘଟଣାର ଶିକାର ହେଉଥିଲେ।
​ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ଏହି ରାସ୍ତା ନିର୍ମାଣ ପାଇଁ ସେମାନେ ବାରମ୍ବାର ସ୍ଥାନୀୟ ଜନପ୍ରତିନିଧି ଏବଂ ବ୍ଲକ ପ୍ରଶାସନର ଦ୍ୱାରସ୍ଥ ହୋଇଥିଲେ। ହେଲେ କେବଳ ପ୍ରତିଶ୍ରୁତି ଛଡ଼ା ସେମାନଙ୍କୁ କିଛି ମିଳିନଥିଲା। ପ୍ରଶାସନର ଏଭଳି ଉଦାସୀନ ମନୋଭାବକୁ ଦେଖି ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା।
​”ସରକାର ଶୁଣିଲେନି ତ କ’ଣ ହେଲା, ଆମେ ନିଜେ ଆମ ଗାଁର ବିକାଶ କରିବୁ” – ଏହି ସଂକଳ୍ପ ନେଇ ରାମଣ୍ଡା ଗ୍ରାମର ଯୁବକ, ବୃଦ୍ଧ ଓ ମହିଳାମାନେ ଏକଜୁଟ ହୋଇଥିଲେ। କିଏ କୋଦାଳ ଧରିଲା ତ କିଏ ଟୋକେଇ, ଆଉ କିଏ ନିଜ ପକେଟରୁ ଅର୍ଥ ସଂଗ୍ରହ କରି ମୁରମ ଓ ପଥର ବ୍ୟବସ୍ଥା କଲେ। ଶେଷରେ ସମସ୍ତଙ୍କ ମିଳିତ ସହଯୋଗ ଓ ଶ୍ରମଦାନ ଫଳରେ ଏକ ସୁନ୍ଦର ଚଲାପଥ ନିର୍ମିତ ହୋଇପାରିଛି।
​”ଆମେ ଅନେକ ଦିନ ଅପେକ୍ଷା କଲୁ, କିନ୍ତୁ କେହି ଆସିଲେନି। ଶେଷରେ ଆମେ ସମସ୍ତେ ମିଶି ନିଷ୍ପତ୍ତି ନେଲୁ ଯେ ନିଜେ ରାସ୍ତା ତିଆରି କରିବୁ। ଆଜି ଆମେ ଖୁସି ଯେ ଆମ ଶ୍ରମ ସଫଳ ହୋଇଛି।” ବୋଲି ଗ୍ରାମବାସୀ ନିଜ ପ୍ରତିକ୍ରିୟା ପ୍ରକାଶ କରିଛନ୍ତି।