ଦହିବରା ଖାଇ ୫୦ରୁ ଅଧିକ ଝାଡାବାନ୍ତିରେ ଆକ୍ରାନ୍ତ

ଦଶରଥପୁର: ଦଶରଥପୁର ବ୍ଲକ ଜୟନ୍ତରା ପଞ୍ଚାୟତ ପାଟପୁର ଗ୍ରାମରେ ଅଭାବନୀୟ ଘଟଣା। ଦହିବରା ଖାଇ ଗ୍ରାମର ୫୦ରୁ ଅଧିକ ଝାଡାବାନ୍ତିରେ ଆକ୍ରାନ୍ତ ହୋଇଥିବା ବେଳେ ୩୦ ଜଣ ଗୁରୁତର ହୋଇ ମେଡ଼ିକାଲରେ ଚିକିତ୍ସିତ ହେଉଛନ୍ତି। ଚିକିତ୍ସିତଙ୍କ ମଧ୍ୟରେ ୫ଜଣ ଶିଶୁ ଓ ୧୫ଜଣ ମହିଳା ଥିବା ଜଣାପଡିଛି। ଘଟଣାର ଗୁରୁତ୍ବକୁ ଦୃଷ୍ଟିରେ ରଖି ଜିଲ୍ଲା ସ୍ୱାସ୍ଥ୍ୟ ବିଭାଗର ଏକ ଟିମ ଗ୍ରାମରେ ପହଞ୍ଚି ଦହିବରା ଖାଇଥିବା ଅନ୍ୟମାନଙ୍କ ସ୍ୱାସ୍ଥ୍ୟ ଅବସ୍ଥା ଉପରେ ଛାନଭିନ କରୁଛି।

​​​​​​​ଗତକାଲି ସକାଳ ପ୍ରାୟ ସାଢେ ୯ଟା ରେ ଗ୍ରାମର ୫୦ରୁ ଅଧିକ ଲୋକ ନିକଟସ୍ଥ ଝୁମ୍ପୁରୀ ଅଞ୍ଚଳର ଜୈନିକ ଦହିବରା ବିକାଳିଙ୍କ ନିକଟରୁ ଦହିବରା ଖାଇଥିଲେ। ଦହିବରା ଖାଇବାର ଅଧ ଘଣ୍ଟା ପରେ ଜଣେ ପରେ ଜଣେ ଝାଡା ବାନ୍ତିରେ ଆକ୍ରାନ୍ତ ହୋଇପଡିଥିଲେ।କିଛି ଆକ୍ରାନ୍ତ ଦଶରଥପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଆସିଥିଲେ । ସେମାନଙ୍କ ମଧ୍ୟରୁ କିଛି ବିଳମ୍ବିତ ରାତିରେ ଗୁରୁତର ହୋଇପଡିବାରୁ ଡାକ୍ତରଙ୍କ ପରାମର୍ଶ କ୍ରମେ ସେମାନଙ୍କୁ ଜିଲ୍ଲା ମେଡିକାଲକୁ ସ୍ଥାନାନ୍ତର କରାଯାଇଥିଲା। ସ୍ଥାନାନ୍ତରିତ ହୋଇଥିବା ଆକ୍ରାନ୍ତଙ୍କ ମଧ୍ୟରେ ୧୫ମହିଳା,୫ଶିଶୁଙ୍କ ସମେତ ୩୦ରୁ ଅଛନ୍ତି । ଅପରପକ୍ଷେ ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ସ୍ୱାସ୍ଥ୍ୟ ବିଭାଗର ଏକ ଟିମ ଆଜି ସକାଳେ ପାଟପୁର ଗ୍ରାମରେ ପହଞ୍ଚି ସ୍ଥିତି ଉପରେ ନଜର ରଖିଛି।